ՀՀ նախկին արտգործնախարար, ԱԺ պատգամավոր Վարդան Օսկանյանի կողմից նոր կուսակցության ստեղծման մասին հայտարարությունը մեծ արձագանք է ստացել քաղաքական և հասարակական շրջանակներում: «Vesti.am»-ն այս թեմայի մասին զրուցել է «Ազգային անվտանգություն» կուսակցության նախագահ Գառնիկ Իսագուլյանի հետ:

-Ցանկացած նման գործունեություն, երբ մարդիկ ուզում են ստեղծել քաղաքական կազմակերպություն, նշանակում է՝ ունեն խնդիրներ: Իսկ խնդիրները կյանքի կոչելու համար այսօր միակ ձևը, ըստ էության, արդեն քաղաքական կուսակցության ստեղծումն է: Ես ողջունում եմ այդ քայլը, և գտնում եմ, որ պարոն Օսկանյանն այն մարդն է, ով իրավունք ունի թե՛ կուսակցություն ստեղծելու, թե՛ քաղաքականության մեջ իր դերակատարությունն ունենալու:

Իսագուլյանը նաև նշել է, որ Վարդան Օսկանյանի հետ ինքն ունեցել է շատ լավ հարաբերություններ:

-Մենք միասին աշխատել ենք՝ ինքը արտգործնախարար, ես նախագահի ազգային անվտանգության հարցերով խորհրդականն եմ եղել: Այդ ընթացքում շատ լավ համագործակցել ենք, հիմա նույնպես հանդիպում ենք, տարբեր հարցերի շուրջ միմյանց հետ քննարկումներ ենք անցկացնում, մեր հարաբերությունները շատ լավ ու մարդկային են, և բնական է՝ այդ առումով իմ անձնական տեսակետը չի կարող բացասական լինել,-եզրափակել է նա:

Աղբյուրը՝ «vesti.am»