Հաշվի առնելով վերջին տարիներին գազի գնի նվազման միտումը՝ երկու տարվա մեջ մոտ 40 դոլար՝ հնարավոր է, որ այն շարունակական լինի: Այսօր լրագրողների հետ հանդիպմանը նման տեսակետ է հայտնել տնտեսագետ Կառլեն Խաչատրյանը:

«Գազպրոմ» ընկերությունը դիմել է Հանրային ծառայությունները կարգավորող հանձնաժողովին՝ առաջարկելով բնակիչների համար 1 խորանարդ մետր գազի սակագինը 9.3 դրամով նվազեցնել: Պատճառը սահմանին գազի գինը 1000 խորանարդ մետրի համար 165 դոլարից 150 դոլարի իջեցնելու պայմանավորվածությունն է:

Ըստ տնտեսագետի՝ ամենաշատը գազ սպառում են շինարարության ոլորտում, ջերմոցային տնտեսություններում. հիմնական սպառման ապրանքների վրա այս գնի փոփոխությունը չի զգացվի:

-Մեզ սպասարկող ընկերությունից շատ բան է կախված, որովհետև իրականում սահմանին առնում է մի գնով, շահագործման և այլ ծախսերի հաշվին էապես մեծանում է սակագինը: Այստեղ մենք որոշակի խնդիրներ ունենք, այսինքն՝ մենք պետք է սլաքը ուղղենք ոչ թե Ռուսաստան, որպեսզի մատակարարվող գազի գինը էապես իջնի, այլ դեպի ոլորտում գործող մենաշնորհային դիրք ունեցող կազմակերպություն, որպեսզի ինքը կառավարման պրոցեսը ճիշտ կազմակերպի,-Խաչատրյանի խոսքն է մեջբերում «vesti.am»–ը:

Սպառողների միության նախագահ Արմեն Պողոսյանն էլ կարծում է, որ բնակիչների համար ավելի շատ պետք է լինի գազի սակագնի իջեցումը.

-Նույն համադրության մեջ չեն Ռուսաստանի գազի արժեքի իջեցումը և մեր բնակարաններում գազի արժեքը. եթե այդպես լիներ, ապա ավելի շատ պետք է իջներ:

Պողոսյանի խոսքով՝ Հայաստանում պետք է լինի դիֆերենցված սակագին, այսինքն՝ քաղաքացիների տարբեր խավերի համար պետք է գործեն տարբեր սակագներ: Շատ սպառողներ, ունևորները, ասենք, ավելի բարձր գնով վճարեն, իսկ աղքատ խավը՝ ավելի ցածր:

«Vesti.am»