Ամենամտահոգիչն այն է, որ ՌԴ ԱԳ նախարար Սերգեյ Լավրովը հայտարարեց՝ իր համար գոնե տեսանելի է, որ ամենաարդյունավետ տարբերակը ղարաբաղյան խնդրի փուլային լուծումն է, ինչին աջակցում են նաև միջնորդները: Այսօր լրագրողների հետ հանդիպմանը նման տեսակետ է հայտնել քաղաքագետ Երվանդ Բոզոյանը՝ ընդգծելով, որ դա մեզ համար լուրջ մարտահրավեր է:

-Բանն այն է, որ միջնորդների համար շահավետ չէ մեծ պատերազմը, որի ամենամեծ սպառնալիքն Ադրբեջանն է, և որպեսզի մեծ պատերազմ չլինի, նրանք փաստացի փորձում են բավարարել Ադրբեջանի որոշակի պահանջներ,-ասել է բանախոսը՝ ընդգծելով, որ սա առաջացել է ռազմական բալանսի փոփոխությունից. վերջին տարիների ընթացքում Ադրբեջանն ուժեղացել է և ուժի դիրքերից սպառնում է մեծ պատերազմով, և մեր խնդիրն է այդ բալանսը վերականգնելը:

Անդրադառնալով փոխզիջումներին՝ քաղաքագետը նկատել է, որ նման վտանգ միշտ էլ կա, քանի որ երբ իշխանությունը հանդիպում է դրսի ճնշումներին, իրենց ներսից ևս ճնշում է անհրաժեշտ լինում, որպեսզի կարողանան դրան դիմակայել.

-Եթե ճնշումները մեծ են լինում, սովորաբար իշխանությունը տուրք է տալիս դրան: Նման ճնշման մեխանիզմ պետք է ստեղծի նաև հայ հասարակությունը, որպեսզի թույլ չտա իշխանություններին գնալ այդ քայլերին,-ասել է Երվանդ Բոզոյանը՝ ընդգծելով, որ հասարակությունն ունի բոլոր հնարավորությունները, որպեսզի թույլ չտա Հայաստանի իշխանություններին գնալ զիջումների:

Քաղաքագետի խոսքով՝ Լավրովը Հայաստան կատարած այցի ժամանակ տեսավ, որ այստեղ մեծ ճնշում կա, և եթե նախկինում ռուսներն ավելի հստակ էին պահանջում փուլային տարբերակի կիրառումը, այսօր ավելի զգուշավոր են տրամադրված:

«Vesti.am»