Քիչ առաջ ոստիկանության ՊՊԾ գնդի տարածքից կրակոցների ձայներ են լսվել։ Ոստիկանական ուժեր են կենտրոնացվում այնտեղ։

Հիշեցնենք, որ այսօր ԱԱԾ–ն հայտարարություն էր տարածել՝ «Սասնա ծռերին» մինչև ժամը 17։00–ն ժամանակ տալով։

***

Ոստիկանության հասարակայնության բաժնի պետ Աշոտ Ահարնոյանը ֆեյսբուքյան իր էջում գրել է.

«Քիչ առաջ ՊՊԾ գնդի տարածքից զինյալ դիպուկահարի կողմից կրակ է բացվել: Սպանվել է ՊՊԾ գնդից 350-400 մետր հեռավորության վրա, ավտոմեքենայի մեջ գտնվող ոստիկանության զորքերի ծառայող, 1986 թ. ծնված Յուրա Տեպանոսյանը»։

***

Մեծ քանակով ոստիկանական ուժեր են շարժվում դեպի ՊՊԾ գնդի տարածք, կարծես, նախապատրաստվում են գրոհի։

***

ՊՊԾ գնդի տարածքից երկու պայթյունի ձայներ լսվեցին։

***

Ազատության հրապարակից երթ մեկնարկեց։ Երկար քննարկումներից հետո որոշվեց նախ փակել Մաշտոցի պողոտան, հետո գնալ Հանրապետության հրապարակ ու այնտեղ որոշել հետագա երթուղին։

***

Երթի մասնակիցները Մաշտոցի պողոտայում են։ Վարորդներից շատերն ազդանշաններով ողջունում են նրանց։

***

Ազատության հրապարակից մեկնարկած երթը հասել է Հանրապետության հրապարակ: Ոստիկանական ուժերը կենտրոնացվել են հրապարակի տարածքում:

***

ՀՀ կառավարության մոտ են ոստիկանության բարձրաստիճան ներկայացուցիչներ՝ Երևանի ոստիկանապետ Աշոտ Կարապետյանը, նրա տեղակալ Վալերի Օսիպյանը:

***

Երթի մասնակիցների թվում կան նաև երեխաներ, ովքեր մեծահասակների հետ հավասար վանկարկում են՝ «Սասնա ծռեր»:

***

Խորենացի փողոցում դեռևս իրավիճակը հանգիստ է:

***

Երթը շարունակվում է Սայաթ–Նովա փողոցով։

***

«Մենք բոլորս Սասնա ծուռ ենք» վանկարկելով՝ ցուցարարները շարժվում են առաջ:

***

Երթի մասնակիցները բարձրանում են Բաղրամյան պողոտայով։ Նրանք միաբերան վանկարկում են՝ Սեր–ժիկ, սիկ–տի՛ր։

***

Ոստիկանները փակել են Բաղրամյան պողոտան։ Երթի մասնակիցները նստացույց են անում։

***

Բաղրամյան պողոտայում է նաև «Ժառանգություն» կուսակցության նախագահ Րաֆֆի Հովհաննիսյանը։

***

Բողոքի գործողության մասնակիցներից մեկն ինքնահրկիզման փորձ կատարեց։ Օգնության են հասել Բաղրամյան պողոտայում նստացույց իրականացնող մյուս ցուցարարները։ Այրվածքներ ստացած տղամարդուն տաքսի ավտոմեքենայով տեղափոխեցին հիվանդանոց։

***

Մոտ երկու ժամ անց ցուցարարները բացեցին Բաղրամյան պողոտան և գնացին Ազատության հրապարակ։

7or.am