ՀՀ ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Էլինար Վարդանյանն օգոստոսի 30-ին հանդիպել է Թրանսփարենսի ինթերնեյշնլ հակակոռուպցիոն կենտրոնի (ԹԻՀԿ) ներկայացուցիչների եւ Ոչ առեւտրային իրավունքի եվրոպական կենտրոնի փորձագետների հետ:

Հանդիպման ընթացքում անդրադարձ է կատարվել «Հասարակական կազմակերպությունների մասին» օրենսդրական փաթեթով առաջարկվող փոփոխություններին:

Ողջունելով հյուրերին՝ Էլինար Վարդանյանը ներկայացրել է օրենսդրական փաթեթի քննարկման եւ ընդունման ընթացակարգերը, անդրադարձել առաջարկվող փոփոխություններին: Հանձնաժողովի նախագահը նշել է, որ մի շարք դրույթներ դեռեւս հստակեցման կարիք ունեն եւ հավելել, որ առաջինից երկրորդ ընթերցում ընկած ժամանակահատվածում բոլոր խնդրահարույց հարցերը կքննարկվեն:

Տիկին Վարդանյանը կարեւորել է փաթեթի որոշ դրույթների վերաբերյալ կենտրոնի ներկայացրած մեկնաբանությունները:

Զրուցակիցները քննարկել են դատարան դիմելու հնարավորությանը, կազմակերպության պարտականություններին եւ պատասխանատվությանը, կազմակերպության անդամների իրավունքների պաշտպանությանը, կամավորներին վերաբերող եւ մի շարք այլ հոդվածների առնչվող մանրամասներ:

Անդրադարձ է կատարվել ոլորտում գործող միջազգային չափանիշներին, արվել են հայեցակարգային խնդիրների լուծմանը եւ օրենսդրական փաթեթի հետագա բարելավմանն ուղղված առաջարկներ: