Եվ այս ամենը տեսնելով՝ ինչպե՞ս հավատաս Սերժ Սարգսյանի խոսքերին: Այն, որ այս մարդու խոսքը ոչինչ չարժե, գիտենք բոլորս, բայց սա ուղղակի խայտառակություն է: Իհարկե, այն ժամանակ էլ, երբ Սարգսյանը «Սասնա ծռերի» հանձնվելուց հետո վերադարձավ Հայաստան և իր հայտնի խայտառակ ելույթով հանդես եկավ, ես և շատերը չհավատացինք նրա պնդմանը, թե հուլիսին տեղի ունեցած դեպքերի հետևանքով ձերբակալված անձանց նկատմամբ քաղաքական հետապնդում չի լինելու, և քննությունն էլ անցնելու է օրենքի սահմաններում:

Սա, փաստորեն, բացահայտ սուտ էր՝ այն բազմաթիվ անամոթ ստերից, որ այս տարիներին «շռայլել է» Սերժ Սարգսյանը: Փաստորեն, մեր իրավական համակարգը գտնվում է դեռ 90-ականներում, երբ կար մի օրենք՝ շեֆի հրահանգ: Երկար-բարակ կարելի է խոսել իրավական պետության սկզբունքների, դրանք մեր Սահմանադրությունում ամրագրելու և քննչական ու դատական մարմինների անկախության կարևորության մասին, սակայն ի՞նչ օգուտ: Սերժ Սարգսյանի Հայաստանում երիտասարդին մեղադրում են 46 ոստիկանի դաժան ծեծի ենթարկելու մեջ: Այս աբսուրդն ու ֆարսը արձանագրելուց հետո էլ ինչի՞ մասին կարելի է լուրջ խոսել:

Դժգոհում էին, թե Մարդու իրավունքների եվրոպական դատարանը բազմաթիվ որոշումներ է կայացրել Հայաստանի դեմ՝ քաղաքացիների նկատմամբ քննչական ու դատական մարմինների կողմից կատարած ակնհայտ հանցագործությունների համար: Մի բան էլ մեղավոր էին փնտրում և այդպես էլ չգտան: Հեսա, մարդը այդ մեղավորներից մի քանիսի անունը տալիս է ու նշում նաև նրանց հանցանքը: Սա էլ պոտենցիալ ՄԻԵԴ-ի դատավճռի հիմք է Հայաստանի դեմ: Մեղավորների անուններն էլ հայտնի են: Դե, մի բան արե՛ք:

Սերժ Սարգսյանն ու նրա սպասավորները, տիրանալով մեր երկրին, ուղղակի ծաղրում են օրենքը, պետականությունը, մեզ բոլորիս: Հիմա էլ փորձում են ցույց տալ, թե իրենց ամեն ինչ կարելի է: Համոզված եմ, որ այս անպարտելիության զգացումն էլ դառնալու է նրանց կործանման պատճառը: Ամբողջ երկիրը «Նուբարաշենում» չես փակի ու նռնականետերով չես պայթեցնի: Այս իշխանությունները դեռևս չեն գիտակցում, որ ճնշող փոքրամասնություն լինելով՝ դուրս են եկել մի ամբողջ ժողովրդի դեմ: Դե, տեսնենք՝ ով կհաղթի: