Թիվ 34 ընտրատարածքային ընտրական հանձնաժողովը, հիմք ընդունելով ընտրական տեղամասերում քվեարկության արդյունքների արձանագրությունները, վերահաշվարկի արդյունքները, քվեարկության արդյունքների վերաբերյալ ընդունած որոշումները, այսօր ամփոփեց Գյումրիում հոկտեմբերի 2-ին անցկացված տեղական ինքնակառավարման մարմինների ընտրությունների արդյունքները։

«Ազատություն»-ը հայտնում է, որ ըստ այդմ՝ ընտրությունների արդյունքում 6 տոկոսի շեմը հաղթահարած քաղաքական ուժերի միջև Գյումրիի 33 անդամներից կազմված ավագանիների խորհրդի մանդատները բաշխվեցին հետևյալ կերպ․ իշխանական Բալասանյան դաշինքը, որը սատարում է գործող քաղաքապետ Սամվել Բալասանյանին, ստացավ 17 մանդատ, «Բարգավաճ Հայաստան» կուսակցությանը բաժին հասավ 8 մանդատ, «Հայկական վերածնունդ» կուսակցությանը՝ 4 մանդատ, ԳԱԼԱ կուսակցությանը՝ 4 մանդատ։

Գյումրիի ավագանու մանդատի հավակնող 3 ուժերը՝ «Բարգավաճ Հայաստան» (ԲՀԿ), «Հայկական վերածնունդ» (ՀՎԿ) ու ԳԱԼԱ կուսակցությունները պնդում են, որ իրենք մեծամասնություն են, իրենց ստացած քվեներով՝ 18 մանդատ ունեն, իսկ իշխանական «Բալասնյան դաշինք»-ը 15: Հոկտեմբերի 6-ին այդ ուժերը միացյալ հայտարարություն էին ստորագրել, պնդելով, որ չեն պատրաստվում մանդատ զիջել։

Նրանց աջակիցներն այսօր առավոտից հավաքվել էին թիվ 34 ԸԸՀ-ի մուտքի մոտ և ընտրությունների արդյունքների հրապարակումից հետո այստեղ բողոքի ակցիա տեղի ունեցավ։ Նրանք պատրաստվում են օրվա ընթացքում ևս շարունակել բողոքի ակցիաները։

Հոկտեմբերի 10-ին կգումարվի ավագանու նիստ, որի ժամանակ փակ-գաղտնի քվեարկությամբ կընտրվի Գյումրիի քաղաքապետ:

Մանրամասները՝ «Ազատություն»-ում։