ԱԺ արտահերթ նիստում քննարկվում է Ընտրական օրենսգրքի նախագիծը։ Որոշվել է, որ առաջին և երկրորդ ընթերցումներն իրականացվելու են 24-ժամյա ռեժիմով:

Հիմնական զեկուցող, Կառավարության աշխատակազմի ղեկավար-նախարար Դավիթ Հարությունյանն ասել է, որ որոշվել է ընտրողների կողմից ստորագրված ցուցակները հրապարակել ԿԸՀ-ի կայքում:

Նրա խոսքով՝ թեև դա Վենետիկի հանձնաժողովի սահմանած սկզբունքներից շեղում է, սակայն երկար քննարկումից հետո հանգել են նման որոշման։

–Վստահությունը շատ ավելի կարևոր է ընտրական գործընթացի նկատմամբ, և այդ սկզբունքի խախտումը պակաս կարևոր է, ուստի գնացինք այս ճանապարհով,-ասել է Դ.Հարությունյանը:

Նաև նշել է, որ պետությունն իր վրա չի կարող վերցնել տեսանկարահանումների գործընթացը, և 5 խմբակցությունների հետ համաձայնության են եկել, որ փաստացի գնումը Կառավարության անունից կարվի, իսկ լիազորությունները վերապահվելու են համատեղ եռակողմ հանձնաժողովին՝ քաղհասարակություն, ընդդիմադիր ներկայացուցիչներ և իշխանություն:

Ազգային ժողովի ընտրությունների ժամանակ կառավարության կողմից սահմանված կարգով անցկացված մրցույթի արդյունքում ընտրված մասնագիտացված կազմակերպությանը Կենտրոնական ընտրական հանձնաժողովը թույլատրում է իրականացնել բոլոր ընտրական տեղամասերից քվեարկության ընթացքի և քվեարկության արդյունքների ամփոփման գործընթացի տեսանկարահանում և միաժամանակյա համացանցային հեռարձակում՝ ուղիղ ժամանակային ռեժիմում՝ հատուկ ստեղծված կայքի (երի) միջոցով:

Տեսանկարահանումը պետք է իրականացվի անշարժ տեսախցիկների միջոցով:

7or.am