ՀՀ մշակույթի նախարար Արմեն Ամիրյանն այսօր խորհրդարանում պատասխանելով լրագրողների հարցին՝ ինքը և՞ս պատրաստվում է անդամագրվել ՀՀԿ–ին՝ ասել է.

–Երկրի խորհրդարանական կառավարման մոդելը ենթադրում է, որ պետք է ստանձնել քաղաքական պատասխանատվություն, այսինքն՝ կուսակցական պատասխանատվություն ևս։ Երկրի մոդել է փոխվում, պետք է համապատասխանել այդ մոդելին:

Նա հավելել է, որ, այդուհանդերձ, դեռ որոշում չունի կայացրած, քանի որ ժամանակ կա մինչև խորհրդարանական կառավարմանն անցնելը։

–Կարելի՞ է՝ մինչև ապրիլ ես ապրեմ, ի՞նչ եք ուզում ինձնից,-դիմել է լրագրողներին նախարարը:

Հիշեցնենք, սակայն, որ այս տարվա հոկտեմբերին Արմեն Ամիրյանը նույն հարցին ի պատասխան՝ հայտարարել էր.

«Որևէ կերպ ինձ չեք տեսնի ՀՀԿ–ի շարքերում, որովհետև, իմ խորին համոզմամբ, մշակույթի նախարարը պետք է լինի անկուսակցական։ Դեռ շատ վաղուց՝ խորհրդային իշխանության տարիներից, ինձ առաջարկել են դառնալ կոմունիստ, այլ կուսակցությունների անդամ, բայց ես շարունակում եմ մնալ իմ ժողովրդի ծառան»։

7or.am