Այսօր կայացած ՀԱՄԱԽՄԲՈՒՄ կուսակցության երիտասարդական միության հիմնադիր համագումարում միության՝ կազմակերպչական գծով փոխնախագահ ընտրված Սիրանուշ Սերոբյանի ելույթը.

–Հարգելի՛ ներկաներ, տիկնայք և պարոնայք,

Շնորհակալ ենք, որ այսօր ներկա եք գտնվում ՀԱՄԱԽՄԲՈՒՄ կուսակցության երիտասարդական միության հիմնադիր համագումարին. մենք կարևորում և արժեվորում ենք ձեր յուրաքանչյուրի ներկայությունը:

Մենք բոլորս գիտակցում ենք, թե ինչպիսի ժամանակներում ենք ապրում կամ, կարելի է ասել, գոյատևում: Քաղաքական մենաշնորհի բացասական հետևանքների կրողը մենք բոլորս ենք: Երբ քաղաքական համակարգը ղեկավարվում է մեկ կենտրոնից, և ամեն ինչ կենտրոնացած է իր իսկ ձեռքում, և բոլոր բնագավառները գտնվում են տոտալ վերահսկողության ներքո, ապա մեր իրավիճակը պարզից էլ պարզ է, թե ինչպիսին պետք է լինի։ Մեր պետության առջև ծառացել են արտագաղթը, կոռուպցիան, արտաքին պետական պարտքը, աղքատությունը, կրթության ցածր մակարդակը։

Մեր երկրում ահռելի չափերի է հասել արտագաղթը, իսկ արտաքին պետական պարտքը հասնում է 6մլրդ-ի, ահա այսպիսին է իշխող կուսակցության վարած քաղաքական կուրսը: Ապրիլյան պարտերազմը ևս մեկ անգամ ապացուցեց, որ արտաքին դիվանագիտական ապարատը հերթական անգամ ձախողել է բանակցությունները, և մեր հերոս հայ զինվորների կյանքի գնով պահպանեցինք մեր պետական սահմանները՝ չնայած տարածքային զիջումներին։

Ունենք 3 տարբերակ ՝

1. կա՛մ արտագաղթում ենք,
2. կա՛մ թողնում ենք՝ իշխանությունը վերարտադրվի, որը անմիջական վտանգ է ներկայացնում մեր պետականության պահպանմանը,
3. կա՛մ համազգային համախմբմամբ տոնում ենք ժողովրդավարության հաղթանակը։

Սիրելի՛ ընկերներ, մենք ընտրել ենք ձեր հետ միասին երրորդ տարբերակը: Երիտասարդությունը կստիպի և կաջակցի դաշինքին՝ քաղաքական այս պայքարը տանելու հաղթանակի:

Դե ուրեմն, բոլորս միասին դեպի հաղթանակ: Հաղթանակ: Հաղթանակ:

7or.am