Ադրբեջանի հարկային նախարարության աշխատակիցները այսօր առավոտյան ստուգումներ են անցկացրել «Թուրան» անկախ լրատվական գործակալությունում և առգրավել են ֆինանսական փաստաթղթերը: Նրանք նաև խուզարկել են աշխատակիցների անձնական իրերը: Այս մասին հայտնում է Ազատությունը։

Հարկային պաշտոնյաները չեն թույլատրել նկարահանել իրենց գործողությունները:

Հարկերից խուսափելու կասկածանքով ստուգումները իշխանությունները սկսել են օգոստոսի 7-ից: Նրանք պնդում են, որ 2014-16 թվականներին «Թուրան»-ը 37 հազար մանաթ (21․5 հազար դոլար) հարկ չի վճարել:

Խմբագրությունը մեղադրանքները չի ընդունում՝ համարելով, որ գործը քաղաքական բնույթ ունի:

«Թուրան» լրատվական գործակալությունը հիմնադրվել է 1990 թվականին: Այն համարվում է Ադրբեջանի սակավաթիվ անկախ լրատվամիջոցներից մեկը: