Քաղաքական

13.10.2017 09:06


Սարգսյան-Ալիև հանդիպումը տեղի կունենա հաջորդ շաբաթ Ժնևում

Սարգսյան-Ալիև հանդիպումը տեղի կունենա հաջորդ շաբաթ Ժնևում

Սերժ Սարգսյան - Իլհամ Ալիև հանդիպումը տեղի է ունենալու հաջորդ շաբաթ Ժնևում, այս մասին Հանրապետականի գործադիր մարմնի նիստից հետո ասաց ՀՀԿ փոխնախագահ Արմեն Աշոտյանը:

Աշոտյանն ընդգծեց, որ չնայած ադրբեջանցի պաշտոնյաների վերջին հայտարարություններին, այդուհանդերձ, Սերժ Սարգսյանը, հավատարիմ լինելով բանակցային գործընթացի ձևաչափին, գնում է հանդիպման:

Հիշեցնենք, հոկտեմբերի 9-ին Ադրբեջանի նախագահ Իլհամ Ալիևը Բաքվում կառավարության նիստի ժամանակ հայտարարել էր, թե ղարաբաղյան կարգավորմանն ուղղված բանակցային գործընթացը վերսկսվում է «առանց որևէ նախապայմանի»:

«Հայաստանը տարբեր տեսակի նախապայմաններ առաջ քաշելով՝ ցանկանում էր խափանել բանակցությունների վերսկսումը, բայց այժմ ստիպված է հրաժարվել այդ քաղաքականությունից», - ասել էր Ադրբեջանի ղեկավարը:

Ի պատասխան Սարգսյանի մամուլի խոսնակ Վլադիմիր Հակոբյանը հայտարարել էր. «ԵԱՀԿ Մինսկի խմբի համանախագահ երկրների նախաձեռնությամբ Հայաստանի և Ադրբեջանի ղեկավարների հանդիպումից օրեր առաջ Ադրբեջանը փորձում է պատրանք ստեղծել, թե բանակցություններին ինքը թելադրողի դիրքերից է հանդես գալիս։ Բաքվի հաշվարկները պարզունակ են՝ խուսափել նախորդ գագաթնաժողովներին ձեռք բերված պայմանավորվածությունները չկատարելու պատասխանատվությունից՝ առաջին հերթին Ադրբեջանի ժողովրդի առջև»։

ՀՀԿ փոխնախագահի կարծիքով՝ բանակցային գործընթացի հաջող ընթացքի համար պետք է վերականգնել հարևանների հանդեպ ապրիլյան պատերազմից առաջ ունեցած թեկուզ թույլ հավատի թելերը: «Բանակցային գործընթացը շունակվում է, բայց այս փուլում առավել կարևոր է այդ գործընթացի մեջ միջավայրի վերականգնումը, որը թույլ կտա առավել լավատեսորեն նայել դեպի բանակցային ապագա»։

Մանրամասները՝ Ազատություն-ում։

Այս խորագրի վերջին նյութերը