Քաղաքական

18.11.2017 18:38


Վանաձորում ՀՀԿ-ն և ՀՎԿ-ն համագործակցության հուշագիր ստորագրեցին

Վանաձորում ՀՀԿ-ն և ՀՎԿ-ն համագործակցության հուշագիր ստորագրեցին

Հայաստանի հանրապետական (ՀՀԿ) և «Հայկական վերածնունդ» (ՀՎԿ) կուսակցությունների Վանաձորի տարածքային կառույցներն այսօր համագործակցության հուշագիր են կնքել՝ «քաղաքի կառավարման համամասնորեն և համատեղ պատասխանատվությունը ստանձնելու մասին»։ Ըստ հուշագրի՝ «Հայկական վերածնունդ»-ը կստանա քաղաքապետի տեղակալի պաշտոնը։

Իրեն ընդդիմադիր հռչակած «Հայկական վերածնունդ» կուսակցությունը մեկ տարի առաջ Վանաձորում համամասնական ընտրակարգով տեղի ունեցած տեղական ինքնակառավարման մարմինների ընտրություններից հետո միացել էր «Լուսավոր Հայաստան» (ԼՀԿ) և «Բարգավաճ Հայաստան» (ԲՀԿ) խմբակցությունների բոյկոտին, ավագանու 5 անդամները ևս չէին ներկայանում նիստերին, ինչի պատճառով նիստերը կայանում էին առանց քվորումի։

Նոյեմբերի 10-ին Սահմանադրական դատարանի կողմից մեծամասնության բացակայությամբ կայացված նիստերը ոչ իրավազոր համարվելուց հետո, Հանրապետական խմբակցությունը բանակցությունների է գնացել ավագանու նիստերը բոյկոտող կուսակցությունների հետ։

Վանաձորի քաղաքապետ Մամիկոն Ասլանյանը քիչ առաջ իր ֆեյսբուքյան էջում գրել է. «Երեկ կոչով դիմել էի Վանաձոր համայնքի ավագանու խմբակցություններին՝ ավագանու նիստերին մասնակցության և մասնակցային կառավարման սկզբունքից ելնելով՝ կառավարման մաս կազմելու հորդորով։ Իմ կոչին արձագանքել է Վանաձորի ՀՎԿ տարածքային կառույցի ղեկավար և ավագանու անդամ Արկադի Փելեշյանը, որի հետ էլ կնքել ենք համագործակցության հուշագիր»։

Նշենք, որ ՍԴ որոշումից հետո ՀՎԿ խմբակցության ղեկավարը, ինչպես նաև խմբակցության մյուս անդամներն անհասանելի էին և զանգերին չէին արձագանքում։

Աղբյուրը՝ Ազատություն

Այս խորագրի վերջին նյութերը