Լրահոս

17.08.2018 18:05


ՀՀԿ-ում չեն բացառում Ռոբերտ Քոչարյանի հետ համագործակցությունը․ Շարմազանով (տեսանյութ)

ՀՀԿ-ում չեն բացառում Ռոբերտ Քոչարյանի հետ համագործակցությունը․ Շարմազանով (տեսանյութ)

Հանրապետական կուսակցությունում չեն բացառում համագործակցությունը Ռոբերտ Քոչարյանի հետ` այսօր «Ազատության» հետ զրույցում այսպիսի հայտարարություն արեց Ազգային ժողովի հանրապետական փոխնախագահ Էդուարդ Շարմազանովը:

Կուսակցության մամուլի խոսնակը, միաժամանակ, ընդգծեց՝ ներկայացում է իր տեսակետը, և Քոչարյանի հետ համագործակցության հարցը ՀՀԿ-ում չեն քննարկել:

«Աշխարհաքաղաքական և արժեքային համակարգի առումով, այո՛, մենք կարող ենք նաև համագործակցել երկրորդ նախագահի հետ և ոչ միայն երկրորդ նախագահի հետ․ տարբեր քաղաքական ուժերի հետ։ Բայց դա ոչ թե լինելու է ընդդեմ հեղափոխության, ինչպես ցանկանում են դա ներկայացնել, այլ դա պետք է լինի հանուն Հայաստանի Հանրապետության, Արցախի Հանրապետության անվտանգության: Բայց սա իմ մասնավոր տեսակետն է: Մենք պաշտոնապես քննարկում չենք արել: Ես տեսականորեն՝ իմ կարծիքը արտահայտեցի»:

Երեկ «Երկիր մեդիա» հեռուստաընկերությանը տված հարցազրույցում Հայաստանի երկրորդ նախագահ Ռոբերտ Քոչարյանը, ով Մարտի 1-ի քրեական գործով մեղադրվում է սահմանադրական կարգը տապալելու մեջ, հայտարարեց, որ վերադարձել է քաղաքականություն:

«Ազատության» դիտարկմանը, թե՝ ՀՀԿ իշխանության տարիներին Ռոբերտ Քոչարյանը բավականին սուր քննադատում էր Հանրապետականին, Շարմազանովը հակադարձեց՝ եղել են նաև ՀՀԿ-Քոչարյան արդյունավետ համագործակցության տարիներ:

«Ես կարող եմ ասել, որ Սերժ Սարգսյանը այն պետական գործիչն է, որը հանուն Հայաստանի Հանրապետության, հանուն Արցախի անվտանգության, հանուն կարևորագույն հարցերի, պատրաստ է իր կուսակցության հետ քննարկել համագործակցությունը բոլոր այն առողջ ուժերի հետ, որոնք պատրաստ են դիմակայել այդ մարտահրավերներին, որոնց վտանգն այսօր կա,-շարունակեց ՀՀԿ խոսնակը,-Իսկ այն, որ այդ առողջ ուժերի մեջ, ըստ իս, մտնում է, և կարծեմ՝ նախևառաջ, Ռոբերտ Քոչարյանը, երկու կարծիք լինել չի կարող»:

Հարցին՝ Հանրապետականը ինչ֊որ բանակցություններ վարո՞ւմ է Ռոբերտ Քոչարյանի հետ, Էդուարդ Շարմազանովը պատախանեց․ «Ոչ, բանակցությունների մասին խոսք չի եղել, մենք դեռևս գործադիր մարմնի նիստ չենք արել: Մենք մեր կարծիքն ենք արտահայտել Քոչարյանի խափանման միջոցի հետ կապված: Մնացածը՝ մենք ունենք մեր մոտեցումները․․․ Մենք ամենամեծ խմբակցությունը ունեցող քաղաքական ուժն ենք: Երեկվա՝ երկրորդ նախագահի հարցազրույցից ես նման տպավորություն ստացա, որ շատ հարցերում՝ նախևառաջ աշխարհաքաղաքական և անվտանգության հիմնահարցեր, ինչպես նաև իրավական տեռորի և քաղաքական տեռորի հետ կապված, խոսքի ազատությունը սպանելու քայլերի հետ կապված, որը արվում է Հայաստանի Հանրապետությունում, մենք ունենք շատ ու շատ մոտ կարծիքներ»:

Այս խորագրի վերջին նյութերը