Բնապահպանության նախարար Էրիկ Գրիգորյանն այսօր ամփոփելով իր գործունեության 100 օրը` նաև անդրադարձել է ՀՀ բնապահպանության և ընդերքի տեսչական մարմնի հաղորդագրությանը, թե Ամուլսարի տարածքում Կարմիր գրքում գրանցված «Ոզնաթուփ մեխակ» բուսատեսակ և «Ապոլո» տեսակի թիթեռ է հայտնաբերվել։

Նախարարը նշել է, որ իր հրամանով ստեղծվել է աշխատանքային խումբ, որի մեջ ներգարվվել են գիտնականներ, Վայրի բնության հիմնադրամի և Տեսչական մարմնի ներկայացուցիչներ, Հայաստանի բույսերի Կարմիր գրքի թիթեռների բաժնի ղեկավարը, ինչպես նաև այն անձինք, ովքեր հայտարարել էին, որ գտել են այդ բուսատեսակն ու կենդանին։

Սեպտեմբերի 4-ին տեղում իրականացված ուսումնասիրությունների արդյունքում աշխատանքային խումբը ներկայացրել է արձանագրություններ՝ համաձայն որոնց հաստատվել է, որ Ամուլսարի տարածքում չկա այն բույսը, որի վրա ձվադրում է «Ապոլո» տեսակի թիթեռը և չի կարող տվյալ վայրը հանդիսանալ այդ թիթեռի բնադրավայր։ Բացի այդ, տրվել են այլ եզրակացություններ, որ խոնավությունը նույնպես բավարար չէ թիթեռի ապրելու համար։

Նախարարությունը լրացուցիչ քայլ էլ է իրականացրել․ ԱԻՆ-ից վերցրել է Ամուլսարի գագաթում հաշվառված վերջին 5 տարիների ջերմային ֆոնի տվյալները և նաև այլ մեթոդաբանությամբ ուսումնասիրել՝ արդյոք այդ պայմաններում թիթեռի ձվադրման համար բավարար կումուլյատիվ ջերմաստիճան կա՞, և նույնպես բացասական եզրակացություն է ստացվել։

Մեխակի մասով նույնպես արձանագրվել է, որ բույսը «Ոզնաթուփ մեխակ» չէ, սակայն այնտեղ այդ ընտանիքի պատկանող լայն տարածված այլ բույսեր կան և հենց դրանցից մեկն է այնտեղ արձանագրվել, որը Կարմիր գրքի բույս չէ։

Նշենք նաև, որ ՀՀ բնապահպանության և ընդերքի տեսչական մարմինը ՀՀ բնապահպանության նախարարությանն առաջարկել էր նոր ի հայտ եկած էկոլոգիական գործոնների հիման վրա ուժը կորցրած ճանաչել ՀՀ բնապահպանության նախարարի կողմից 29.04.2016թ. հաստատված թիվ ԲՓ-35 պետական փորձաքննական եզրակացությունը:

Այս կապակցությամբ էլ նախարարը պարզաբանել է, որ Կարմիր գրքում գրանցված կենդանու լինելըորևիցե տարածքում ինքնին Ընդերքի մասին օրենքի 26-րդ հոդվածի հետ առնչություն չունի։ Բայց եթե դա բնակատեղի է, ապա կարող է հանդիսանալ ի հայտ եկած էկոլոգիական նոր գործոն, քանի որ ըստ օրենքի այդ նույն հոդվածի՝ հայցվող տեղամասում արգելվում է ընդերքօգտագործման մասին թույլտվության տրամադրումը, եթե առկա է կարմիրգրքային կենդանու բնադրավայր։

Նախարարն ընդգծել է, որ օրենքում խոսվում է հայցվող տեղամասի մասին, սակայն տվյալ դեպքում տեղամասն արդեն իսկ հայցված է։

7or.am