Քաղաքական

10.09.2018 13:15


Դատարանը Սերժ Սարգսյանի եղբորորդուն գրավի դիմաց ազատ է արձակել (տեսանյութ)

Դատարանը Սերժ Սարգսյանի եղբորորդուն գրավի դիմաց ազատ է արձակել (տեսանյութ)

Երևանի ընդհանուր իրավասության առաջին ատյանի դատարանի Շենգավիթի նստավայրում սեպտեմբերի 10-ին հրապարակվեց ՀՀ երրորդ նախագահ Սերժ Սարգսյանի եղբորորդու՝ Հայկ Սարգսյանի կալանքը փոխելու, վերացնելու կամ անփոփոխ թողնելու հարցով որոշումը: Ինչպես տեղեկացնում է «Արմենպրես»-ը, դատարանը որոշում է կայացրել 50 միլիոն դրամի գրավի դիմաց նրան ազատ արձակել։

Ըստ քննչական կոմիտեի տարածած հաղորդագրության` Դավիթ Սիմոնյանը, հրազենային վնասվածքով թիվ 3 կլինիկական հիվանդանոց էր տեղափոխվել 2007 թվականի ապրիլի 1-ին՝ Երևան քաղաքի Թումանյան-Նալբանդյան փողոցների խաչմերուկից: Նույն օրը ոստիկանության Կենտրոնական բաժին էր ներկայացել քաղաքացի Ա.Ղևոնդյանը, ներկայացրել ատրճանակ և հայտնել, թե այն գտել է իրենց շենքին կից մանկապարտեզից դեպի նկուղ տանող աստիճանների մոտ, որի հետ անզգույշ վարվելու հետևանքով կրակել է՝ մարմնական վնասվածք պատճառելով ընկերոջը՝ Դ.Սիմոնյանին:

Ոստիկանության Կենտրոնականի քննչական բաժնում 2007 թվականի մայիսի 28-ին որոշում էր կայացվել՝ փաստի առթիվ հարուցված քրեական գործի վարույթը կարճելու և Ա.Ղևոնդյանի նկատմամբ քրեական հետապնդում չիրականացնելու մասին՝ ՀՀ քրեական դատավարության օրենսգրքի 35-րդ հոդվածի 1-ին մասի 4-րդ և 5-րդ կետերով նախատեսված՝ կողմերի հաշտության և բողոքի բացակայության հիմքով:

Նոր երևան եկած հանգամանքներով պայմանավորված` 2018 թվականի հուլիսի 3-ին վերացվել է քրեական գործի վարույթը կարճելու որոշումը, հարուցվել է նոր քրեական գործ, որով նախաքննության կատարումը հանձնարարվել է ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնին։ Քննիչն այն վարույթ է ընդունել և ձեռնարկել անհրաժեշտ քննչական և դատավարական այլ գործողություններ՝ դեպքի իրական հանգամանքները պարզելու, բազմակողմանի, օբյեկտիվ և լրիվ քննությունն ապահովելու ուղղությամբ:

Արդյունքում՝ փաստական տվյալներ են ձեռք բերվել առ այն, որ Դավիթ Աշոտի Սիմոնյանին մարմնական վնասվածքը պատճառվել է ոչ թե անզգուշությամբ Արթուր Ղևոնդյանի կողմից, այլև նշված օրը նրա նկատմամբ կատարվել է սպանության փորձ, պարզվել առերևույթ հանցագործություն կատարած անձի ինքնությունը:

Մասնավորապես՝ քննության տվյալներով` Դ.Սիմոնյանն իրականում հրազենային վնասվածքն ստացել է Հայկ Ալեքսանդրի Սարգսյանի՝ Երևանի կենտրոնում գտնվող բնակության վայրի նկուղային հարկում գտնվող սենյակում՝ 2007 թվականի ապրիլի 1-ին՝ ժամը 16:00-ի սահմաններում՝ վերջինիս կողմից արձակված կրակոցի հետևանքով:

Կենցաղային հարցերի շուրջ տեղի ունեցած վիճաբանության ժամանակ տուժողի ուղղությամբ կրակոցն արձակվել է «SIG SAUER» տեսակի «P 266» մոդելի ատրճանակից, որովայնի ուղղությամբ՝ պատճառելով կյանքին վտանգ սպառնացող առողջության ծանր վնաս՝ որովայնի խոռոչի հրազենային միջանցիկ վիրավորման ձևով՝ լյարդի և աջ երիկամի վնասումով, աջ երիկամի հեռացումով՝ ուղեկցված հետորովայնային հեմատոմայով, ներքին արյունահոսությամբ:

Քրեական գործով ձեռնարկված միջոցառումների արդյունքում հայտնաբերվել և առգրավվել է «SIG SAUER» տեսակի «P 266» մոդելի ատրճանակը:

Ձեռք բերված ապացույցների հիման վրա՝ Հայկ Ալեքսանդրի Սարգսյանին մեղադրանք է առաջադրվել՝ սպանության փորձի, ապօրինի կերպով հրազեն ձեռք բերելու և պահելու համար՝ ՀՀ քրեական օրենսգրքի 34-104-րդ հոդվածի 1-ին և 235-րդ հոդվածի 1-ին մասերով:

***

Դատարանը Հայկ Սարգսյանի նկատմամբ գրավի կիրառման բավականին բարձր շեմ է սահմանել։ News.am-ը հայտնում է, որ այս մասին այսօր՝ սեպտեմբերի 10–ին Երեւան քաղաքի ընդհանուր իրավասության դատարանում լրագրողների հետ զրույցում հայտարարեց ՀՀ երրորդ նախագահ Սերժ Սարգսյանի եղբորորդու՝ Հայկ Սարգսյանի պաշտպան Երեմ Սարգսյանն՝ անդրադառնալով իր պաշտպանյալին 50 մլն դրամ գրավի դիմաց ազատ արձակելու դատարանի որոշմանը։

Փաստաբանը տեղեկացրեց, որ նախքան դատական նիստի մեկնարկը՝ Հայկ Սարգսյանի ընկերներն իրեն հայտնել են, որ պատրաստ են վճարելու դատարանի կողմից նախատեսված գրավի գումարը։

«Ես շատ ուրախ եմ, որ դատարանն իր մեջ ուժ գտավ եւ օբյեկտիվ որոշում կայացրեց»,-ասաց նա՝ կարծիք հայտնելով, որ դատարանի որոշմանը նպաստել է նախորդ դատական նիստում տեղի ունեցած պրոցեսները։

Պաշտպանի խոսքով, սակայն դատարանը պետք է վերացներ իր պաշտպանյալի նկատմամբ ընտրված փախանման միջոց կալանավորումը, քանի որ այս գործով կալանքի հիմքեր առկա չեն։

«Ճիշտ է, ես համարում եմ, որ խափանման միջոցի հիմքեր ընդհանրապես գոյություն չունեն, պետք է կալանքն ընդհանրապես վերացվեր, բայց, հաշվի առնելով գործի նկատմամբ հասարակական հետաքրքրությունը, համարում եմ, որ դատարանը այս որոշմամբ որոշակիորեն վերականգնեց արդարադատությունը»։

Ըստ Երեմ Սարգսյանի, եթե վարույթն իրականացնող մարմինը 2018թ. հուլիսի 4–ին որոշել է, որ Հայկ Սարգսյանի նկատմամբ ընտրված՝ ստորագրություն չհեռանալու մասին խափանման միջոցը բավարար էր, որպեսզի գործին խոչընդոտելու վտանգը կանխվի, ապա անտրամաբանական էր նրան կալանավորելը։

Այս գործով մեղադրող դատախազ Աբգար Առաքելյանն էլ լրագրողների հետ զրույցում հայտարարեց, որ դատարանի որոշումն ուսումնասիրելուց հետո կքննարկեն այն բողոքարկելու հարցը։

Այս խորագրի վերջին նյութերը