Քաղաքական

22.11.2018 14:52


Ընտրելու իրավունք ունեցողների 0,05%-ը պատգամավորության թեկնածու է

Ընտրելու իրավունք ունեցողների 0,05%-ը պատգամավորության թեկնածու է

ՀՀ-ում դեկտեմբերի 9-ին կայանալիք ԱԺ արտահերթ ընտրություններին քվեարկության իրավունք ունեցող 2 մլն 574 հազար 916 քաղաքացիների 0,05%-ը պատգամավորության թեկնածու է:

«Արմենպրես»-ը Կենտրոնական ընտրական հանձնաժողովի պաշտոնական կայքից առանձնացրել է արտահերթ ընտրությունների ընտրողների և թեկնածուների թվերի վերաբերյալ ուշագրավ վիճակագրական տվյալները:

Դեկտեմբերի 9-ին կայանալիք ԱԺ արտահերթ ընտրություններին մասնակցելու համար Կենտրոնական ընտրական հանձնաժողովը գրանցել է 11 քաղաքական ուժի, որոնց ներկայացրած ընտրական ցուցակներում թեկնածուների ընդհանուր թիվը 1471 է, որը կազմում է քվեարկության իրավունք ունեցող 2 մլն 574 հազար 916 քաղաքացիների 0.05%-ը:

Պատգամավորության թեկնածուների շրջանում կանայք և տղամարդիկ կազմում են, համապատասխանաբար, 39.8% և 60.2%:

Ընտրություններին մասնակցող ուժերից ամենամեծ նախընտրական ցուցակը «Իմ քայլը» կուսակցությունների դաշինքինն է` 182 թեկնածու: Երկրորդը` «Սասնա Ծռեր» համահայկական կուսակցությունն է` 174 թեկնածուով: «Բարգավաճ Հայաստան» կուսակցությունը 169 թեկնածուով այս ցուցակում երրորդն է: «Լուսավոր Հայաստան» կուսակցությունն ունի` 156, «Հայ Յեղափոխական Դաշնակցություն» կուսակցությունը` 152, «Մենք» կուսակցությունների դաշինքը` 133, «Օրինաց երկիր» կուսակցությունը` 131, «Հայաստանի Հանրապետական» կուսակցությունը` 125, «Քրիստոնեա-ժողովրդական վերածնունդ» կուսակցությունը` 85, «Ազգային առաջընթաց» կուսակցությունը` 83, իսկ «Քաղաքացու որոշում» սոցիալ-դեմոկրատական կուսակցությունը` 81 թեկնածու:

Մարզերի շարքում ամենաշատ ընտրողների թիվն ունի Կոտայքը` 239 հազար 847, իսկ ամենաքիչը` Տավուշի մարզը` 107 հազար 139 ընտրողով: Երևանի ընտրական տարածքներից ամենաշատ ընտրելու իրավունք ունեցող քաղաքացիներն ունի Մալաթիա-Սեբաստիա, Շենգավիթ տարածքը` 225 հազար 223 ընտրող:

Կենտրոնական ընտրական հանձնաժողովը հրապարակել է նաև ՀՀ Ազգային ժողովի 2018 թվականի դեկտեմբերի 9-ին կայանալիք արտահերթ ընտրություններին նախորդող վերջին մարդահամարի տվյալներով առավել մեծ թվով մշտական բնակչություն ունեցող առաջին չորս ազգային փոքրամասնությունների վերաբերյալ տեղեկատվությունը: Վերջին մարդահամարն անցկացվել է 2011 թվականին, որի տվյալներով Հայաստանի Հանրապետությունում առավել մեծ թվով մշտական բնակչություն ունեցող առաջին ազգային փոքրամասնությունը եզդիներն են` 35.308, երկրորդը ռուսները` 11.911, 3-րդը ասորիները` 2.769, 4-րդը քրդերը` 2.162 քաղաքացի:

Հայաստանում արտահերթ խորհրդարանական ընտրությունները կայանալու են 2018 թ.դեկտեմբերի 9-ին: Քարոզչության ժամանակահատվածը նոյեմբերի 26-ից դեկտեմբերի 7-ն է։Ընտրական օրենսգրքով սահմանվել է 12-օրյա ժամկետ:

Այս խորագրի վերջին նյութերը