Մինչև իշխանափոխությունը շատերը, այդ թվում՝ Նիկոլ Փաշինյանը, քննադատում էին Սերժ Սարգսյանին նոր Սահմանադրության շրջանակներում սուպերվարչապետական լիազորություններ սեփականաշնորհելու համար: Սարգսյանը մեղադրվում էր անձնիշխանական համակարգ կառուցելու և խորհրդարանին կցորդ սարքելու մեջ:

Փաշինյանը արդարացիորեն քննադատում էր այդ սուպերվարչապետական համակարգը և խոստանում, որ իշխանափոխությունից հետո այն կվերանայի ու կբալանսավորի:

Խոսվում էր նաև այն մասին, որ խորհրդարանական կառավարման համակարգին անցնելը նշանակում է օրենսդիր մարմնի դերի բարձրացում և այդ մարմնի վերահսկողական լիազորությունների ավելացում: Խոսքը մասնավորապես վերաբերում էր ուժային կառույցների վերահսկողությանը:

Սերժ Սարգսյանն այնպիսի օրենսդրական փաթեթներ էր ներկայացնում ԱԺ-ին, ըստ որոնց՝ ոստիկանությունը և ԱԱԾ-ն ենթարկվում էին վարչապետին: Դրանք վարչապետին կից մարմիններ էին դարձվել, այլ ոչ թե նախարարություններ: Նպատակը պարզ էր՝ ուժայիններին ենթարկեցնել ոչ թե խորհրդարանին, այլ անձամբ վարչապետին:

Ինչպես հայտնի է, առանձին նախարարների խորհրդարանը կարող է պաշտոնանկ անել: Ու թեև խորհրդարանի և՛ իշխանական, և՛ օրենսդիր հատվածները 2017-ի ԱԺ ընտրությունների արդյունքում հայտնվել էին իր գրպանում, այդուհանդերձ նա ուժայիններին մոտ չթողեց օրենսդիրին: Սարգսյանն օրենսդրական փաթեթով զրկել էր իր կողմից ամբողջությամբ վերահսկելի խորհրդարանին ուժայիններին որևէ ձևով միջամտելու հնարավորությունից, ինչը ցույց էր տալիս, որ օրենսդիր մարմինը նրա կողմից դիտարկվում էր ընդամենը որպես դակիչ օղակ:

Տեղի ունեցավ իշխանափոխություն, բայց Նիկոլ Փաշինյանը, ով նախկինում քննադատում էր Ս. Սարգսյանի սուպերվարչապետական լիազորությունները, պահպանեց այն համակարգը, որը «կարվել» էր Սերժ Սարգսյանի վրայով:

Մամուլի ասուլիսի ժամանակ լրագրողներից մեկը վարչապետ դարձած Փաշինյանից հետաքրքրվել էր, թե արդյոք նա իրեն հարմարավե՞տ է զգում այն սուպերվարչապետական կոստյումի մեջ, որը «պատրաստվել էր» Սերժ Սարգսյանի հագով, և արդյոք չի՞ ցանկանում դրանից հրաժարվել: «Սազո՞ւմ է»,-կեսկատակ արձագանքել էր Փաշինյանը:

Փաշինյանն ասել էր, որ ինքը դեմ է, որ իշխանությունը խորհրդարանական կառավարման համակարգի պայմաններում բալանսավորվի վարչապետի ու նախագահի միջև: Ըստ նրա՝ բալանսավորումը պետք է լինի կառավարության, դատական իշխանության և օրենսդիր մարմինների միջև:

Այսօր ներկայացվել է ««Կառավարության կառուցվածքի և գործունեության մասին» օրենքում փոփոխություններ և լրացումներ կատարելու մասին» օրենքի նախագիծը, որից պարզ է դառնում, որ ոչ մի բալանսավորում օրենսդիր ու գործադիր, ավելի ճիշտ՝ օրենսդիր մարմնի ու վարչապետական ինստիտուտի միջև տեղի չի ունենալու, քանզի ուժայինները մնացել են վարչապետին կից կառույցներ և որևէ կերպ հաշվետու չեն օրենսդիրին: ՊԵԿ-ը նույնպես մնում է անձամբ Փաշինյանին կից կառույցի կարգավիճակում:

Ինչո՞ւ Փաշինյանը կրկնեց Սերժ Սարգսյանին: Վերջինս չէր վստահում իր պատգամավորներին ու նաև չէր կարծում, որ նրանք ունեն այնքան կշիռ, որպեսզի ուժայիններին վերահսկեն:

Խորհրդարանում 70 տոկոս պատգամավորական աթոռներ զբաղեցրած «Իմ քայլը» դաշինքին Փաշինյանը չի՞ վստահում: Թե՞ կարծում է, որ նախկինում հնչեցրած տեսակետները կարելի է շատ հանգիստ մոռանալ, ինչպես որ բազմաթիվ այլ դեպքերում է եղել՝ սկսած պարտադիր կուտակայինից մինչև արագաչափեր:

Կորյուն Մանուկյան