Հայտնի գաղտնալսման հրապարակումից հետո պարզ դարձավ, որ բոլոր խոսակցություններն այն մասին, թե իբր դատական համակարգը «թավշյա հեղափոխությունից» հետո գործելու է անկախ, չեն համապատասխանում իրականությանը:

«Հեռախոսային արդարադատությունը» և դատական համակարգի նկատմամբ լուրջ ճնշումները գործադիր իշխանության կողմից հիմա, թերևս, ավելի լայն կիրառում ունեն, քան նախկինում: Պատճառը ոչ թե այն է, որ նախկիններն ավելի քիչ ցանկություն ունեին միջամտելու քաղաքական ենթատեքստ պարունակող դատական գործընթացներին, այլ այն, որ նախկինում այդպիսի միջամտությունների կարիքն անհամեմատ քիչ էր:

Թեև Նիկոլ Փաշինյանը հայտարարում է, որ ինքը չի միջամտում դատական որոշումներին և դատարաններն անկախ են, բայց դա, մեղմ ասած, այդպես չէ: Եթե ՀՔԾ-ն ու ԱԱԾ-ն նախապես գիտեն կամ ցուցում են տալիս, թե ինչ որոշումներ պետք է կայացնեն դատարանները և այդ մասին զեկուցում են Փաշինյանին, ապա հասկանալի է, թե ինչն ինչոց է:

Այս ամենը հաշվի առնելով՝ հետաքրքիր է, թե ի՞նչ որոշում է կայացնելու Նիկոլ Փաշինյանը Ռոբերտ Քոչարյանի հարցով: Նա մնալո՞ւ է կալանքի տակ, թե՞ ոչ:

Ինչպես հայտնի է, ՀՀ 2-րդ նախագահի խափանման միջոց կալանքը գրավով փոխարինելու միջնորդությամբ դատական նիստը նախորդ տարվա վերջում որոշեցին հետաձգել: Նիստը տեղի կունենա հունվարի 9-ին:

Ուշագրավն այն է, որ Քոչարյանը միակ մարդն է, ով հետիշխանափոխական շրջանում հարուցված քաղաքական ենթատեքստ ունեցող գործերով մնում է անազատության մեջ:

Քոչարյանի կալանավորմամբ Փաշինյանը բացեց «Պանդորայի արկղը», ինչը հղի է շատ կանխատեսելի հետևանքներով:

Պետրոս Ալեքսանյան