Քաղաքական

29.01.2019 10:12


Հանն այսօր Երևանում կսկսի բանակցությունները Հայաստանի նոր ղեկավարության հետ

Հանն այսօր Երևանում կսկսի բանակցությունները Հայաստանի նոր ղեկավարության հետ

Եվրամիության ընդարձակման հարցերով հանձնակատար Յոհանես Հանն այսօր Երևանում կսկսի բանակցությունները Հայաստանի նոր ղեկավարության հետ։ Սա եվրոպացի բարձրաստիճան պաշտոնյայի առաջին այցն է Երևան՝ թավշյա հեղափոխությունից հետո, որի ընթացքում Բրյուսելը մտադիր է իր աջակցությունը հայտնել նոր կառավարության սկսած բարեփոխումներին, «Ազատության»-ը տված հարցազրույցում ասաց Հանի մամուլի խոսնակ Մայա Կոսիյանչիչը:

«Հանձնակատարը Երևանում է՝ քննարկելու այն աջակցությունը, որ Եվրամիությունը տրամադրում է Հայաստանին բարեփոխումների ճանապարհին: Հանձնակատարը կհանդիպի նոր կառավարությանը, նախագահ Արմեն Սարգսյանին և քաղաքացիական հասարակության ներկայացուցիչներին: Կարծում եմ՝ ընդհանուր առմամբ, այցի հիմնական ուղերձը աջակցությունն է Հայաստանի բարեփոխական ջանքերին, որոնց նպատակն է բարելավել քաղաքացիների կյանքը»:

Հանձնակատար Հանը եվրոպացի առաջին պաշտոնյաներից էր, որ շնորհավորեց Նիկոլ Փաշինյանին՝ դեկտեմբերյան արտահերթ խորհրդարանական ընտրություններում տարած հաղթանակի կապակցությամբ:

Երկու պաշտոնյաները նաև մեկ անգամ արդեն հանդիպել են՝ անցած աշնանը Նյու Յորքում՝ ՄԱԿ-Ի գլխավոր վեհաժողովի շրջանակներում:

Ըստ Հայաստանի կառավարության պաշտոնական հաղորդագրության, Փաշինյանը եվրոպացի հանձնակատարին վստահեցրել էր, որ իր կառավարությունը հետամուտ է ժողովրդավարության ամրապնդմանն ու ընդգծել՝ այս հարցում Երևանն ակնկալում է ԵՄ համընդգրկուն աջակցությունը:

Հանը բանակցություններից հետո Թվիթերում գրել էր. «Շատ լավ հանդիպում ունեցա Հայաստանի վարչապետի հետ: Ես վստահեցրի Փաշինյանին, որ Եվրամիությունը կշարունակի աջակցել նրա բարեփոխումներին ու Հայաստանին: Տեսնենք՝ ինչպես կարող ենք մեր օգնության փաթեթն ավելի նպատակային օգտագործել՝ առաջնային բարեփոխումների համար»:

Հանձնակատարի այցը համընկնում է Եվրամիության արևելյան գործընկերության ծրագրի տասնամյակին, որով Բրյուսելն աջակցություն է տրամադրում նախկին խորհրդային միության վեց պետություններին, այդ թվում՝ Հայաստանին՝ ժողովրդավարության, մարդու իրավունքների պաշտպանության ու տնտեսության ազատականացման ուղղությամբ կատարված բարեփոխումների համար:

Հանձնակատարի խոսնակ Մայա Կոսիյանչիչի հաղորդմամբ, երևանյան այցի ժամանակ Հանը կանդրադառնա նաև այդ ծրագրին ու երկկողմ հարաբերությունների ամրապնդմանը:

«Այս այցով նա ցանկանում է նաև կարևորել Հայաստանի հավատարմությունը Արևելյան գործընկերությանը, որի տասնամյակն է այս տարի, և այդ համատեքստում ընդգծել առավել ընդարձակ տարածաշրջանային համագործակցության անհրաժեշտությունը, որը կնպաստի ոչ միայն տարածաշրջանի, այլև ընդհանուր առմամբ, ողջ Եվրոպայի բարգավաճմանն ու կայունությանը»,-«Ազատության»-ն ասել է Մայա Կոսիյանչիչը:

Այս խորագրի վերջին նյութերը