ՀՀ Ազգային ժողովի պետական-իրավական հարցերի մշտական հանձնաժողովի առաջին արտահերթ նիստում «Իմ քայլը» խմբակցության պատգամավոր Աննա Կարապետյանը միաձայն ընտրվեց հանձնաժողովի նախագահի տեղակալի պաշտոնում:

«Արմենպրես»-ի փոխանցմամբ՝ փետրվարի 8-ին տեղի ունեցած նիստում նրա թեկնածությունն առաջադրեց ԱԺ-ում մեծամասնություն ունեցող «Իմ քայլը» խմբակցությունը:

«ԱԺ կանոնակարգ սահմանադրական օրենքի համաձայն այս պաշտոնում առաջադրելու իրավունքը պատկանում է «Իմ քայլը» խմբակցությանը»,- ասաց հանձնաժողովի նախագահ Վլադիմիր Վարդանյանը:

Նախագահի տեղակալի պաշտոնում առաջադրված Աննա Կարապետյանը նշեց, որ իր պետական գործունեությունը մեկնարկել է հենց պետաիրավական հարցերի մշտական հանձնաժողովում:

«Այս պաշտոնում առաջադրվելը միաժամանակ թե մեծ պատիվ է ինձ համար՝որպես իրավաբանի, թե մեծ պատասխանատվություն, հաշվի առնելով կենտրոնական դերն ու նշանակությունը Ազգային ժողովում»,- նշեց Կարապետյանը:

Հանձնաժողովն առաջին նիստում միաձայն հաստատեց նաև հանձնաժողովի աշխատակազմի նախագիծը:

«Ազգային ժողովի կանոնակարգ սահմանադրական օրենքի համաձայն կանոնակարգը հաստատվում է հիմք ընդունելով օրինակելի ձևը: Մենք ներկայացված նախագծում շատ չենք շեղվել օրինակելի ձևից և նախորդ ԱԺ հանձնաժողովի աշխատակարգից»,- ասաց Վլադիմիր Վարդանյանը:

Հանձնաժողովի արտահերթ նիստը հրավիրվել էր դրա նախագահ Վլադիմիր Վարդանյանի նախաձեռնությամբ: