Լոս Անջելեսի շրջանի Սան Ֆերնանդո քաղաքի բնակչուհի Զառա Գեմիլյանը վերջերս դարձել է «Միսիս Կալիֆոռնիա Գլոբ 2019» (Mrs. California Globe 2019) գեղեցկության մրցույթի հաղթող: Այս մասին հայտում է Rusarminfo-ն՝ նշելով, որ մրցույթն անցկացվում է 1996 թվականից ի վեր:

Աղբյուրի փոխանցմամբ՝ Զառա Գեմիլյանը ծնվել է Հայաստանում 1983 թվականին, այնուհետև ընտանիքի հետ միասին տեղափոխվել է Մոսկվա, այնտեղից էլ Միացյալ Նահանգներ:

«Հայաստանն ինձ համար միշտ անուրջների վայր է եղել: Երբ ես երեխա էի, ես Հայաստան մեկնում էի ամեն ամառ: Այն ինձ համար եղել է անհոգ և երջանիկ վայր: Ես սիրում եմ ճամփորդել և շատ սիրելի քաղաքներ ունեմ, սակայն ոչինչ չի համեմատվի այն զգացումի հետ, որն ապրում եմ, երբ ինքնաթիռը վայրէջք է կատարում Զվարթնոց օդանավակայանում»,-Rusarminfo-ին տված հարցազրույցում ասել է Զառան:

Կալիֆոռնիայի մասնավոր համալսարանի շրջանավարտն ուսումն ավարտելուց հետո զբաղվել է շուկայագիտության զարգացմամբ Կալիֆոռնիայի շինարարական ընկերություններից մեկում:

Աղբյուրը՝ Tert.am