Քաղաքական

15.05.2019 16:40


Տարոնիկ և Արշալույս համայնքի բնակիչները փակել էին Արմավիր-Երևան ճանապարհը

Տարոնիկ և Արշալույս համայնքի բնակիչները փակել էին Արմավիր-Երևան ճանապարհը

Արմավիրի մարզի Տարոնիկ և Արշալույս համայնքի բնակիչները այսօր փակել էին Երևան-Արմավիր ճանապարհը: Այս մասին Tert.am-ի հետ զրույցում հայտնեց Արշալույսի բնակիչ Էլյա Միրզախանյանը: Նա նշեց, որ դժգոհությունը կապված է գյուղապետերի աշխատանքի հետ, և այսօր ոստիկանների հետ բախում է եղել, որից հետո ճանապարհը բացել են:

«Մենք մասնակցել ենք հեղափոխությանը, բայց հեղափոխությունը միայն տեղի է ունեցել քաղաքում: Գյուղերում հեղափոխության մասնակիցներին գյուղապետերը ճնշում են: Ամեն մի բանի համար գյուղացուն ճնշում են՝ մեկը մի պատ է շարել, մեկը մի քար է դրել, մեկը մի բան է արել, ամեն ինչի հետևից ընկնում են, իսկ իրենք որ այդքան թալանել են, ոչ մի բանի համար պատասխանատվություն չեն կրում»,-ասաց բնակիչը:

Նա նշեց, որ Զարզանդ Գրիգորյանը գյուղացիների համար տույժ, տուգանքներ է սահմանում, սպառնալիքներ է ներկայացնում:

«Գնացել է ոստիկանություն, դիմում-բողոք է ներկայացրել, թե «գյուղացիներն ուզում են իմ ցորենի արտերը այրել» »,-ասաց նա:

Tert.am-ը փորձեց մեկնաբանություն ստանալ նաև Զարզանդ Գրիգորյանից, ով, սակայն, ասաց, որ ոչ մի բանից տեղյակ չէ և անջատեց հեռախոսը: Իսկ Տարոնիկ համայնքի ղեկավարը երկրում չէր և նրա փոխարեն մեր հեռախոսազանգին պատասխանեց հաշվապահը, ով նշեց, որ իրենք ևս ոչ մի բանից տեղյակ չեն:

Այս խորագրի վերջին նյութերը