Լրահոս

24.05.2019 18:40


Կալանավորվել է Ծաղկաձորի նախկին քաղաքապետ Գարուն Միրզոյանի 19-ամյա տղան (լրացված)

Կալանավորվել է Ծաղկաձորի նախկին քաղաքապետ Գարուն Միրզոյանի 19-ամյա տղան (լրացված)

ՀՀ ՊՆ ռազմական ոստիկանության կողմից ձեռնարկված օպերատիվ-հետախուզական միջոցառումների արդյունքում բացահայտվել է բժշկական փաստաթղթեր կեղծելու և օգտագործելու ճանապարհով ժամկետային զինվորական ծառայության հերթական զորակոչից խուսափելու դեպք: Այդ առթիվ 2019թ. մայիսի 17-ին ՀՀ քրեական օրենսգրքի 325-րդ հոդվածի 1-ին մասով (Փաստաթղթեր, դրոշմներ, կնիքներ, ձևաթղթեր, տրանսպորտային միջոցների հաշվառման համարանիշներ կեղծելը, իրացնելը կամ օգտագործելը), 327-րդ հոդվածի 2-րդ մասի 2-րդ կետով (Ժամկետային զինվորական կամ այլընտրանքային ծառայությունից, վարժական հավաքներից կամ զորահավաքներից խուսափելը) և 376-րդ հոդվածի 1-ին մասով (Անփույթ վերաբերմունքը ծառայության նկատմամբ) ՀՀ ՊՆ Աբովյանի ՌՈ բաժնում հարուցվել է քրեական գործ:

Վերջինիս շրջանակում ՀՀ քրեական օրենսգրքի 327-րդ հոդվածի 2-րդ մասի 2-րդ կետով նախատեսված հանցագործություն կատարելու կասկածանքով նույն օրը ձերբակալվել է ՀՀ Կոտայքի մարզի Հրազդան քաղաքի՝ 2000 թվականին ծնված մի բնակիչ: Մայիսի 20-ին քրեական գործով մինչդատական քրեական վարույթի նկատմամբ հսկողություն իրականացնող դատախազի կողմից քրեական գործը վերցվել է հետաքննության մարմնից և հանձնվել է ՀՀ ՔԿ ԶՔԳՎ չորրորդ կայազորային քննչական բաժնին` նախաքննություն կատարելու նպատակով, որը նույն օրն ընդունվել է վարույթ: Ձեռք բերված ապացույցների բավարար համակցության հիման վրա մայիսի 20-ին Երևանի կայազորի զինվորական դատախազի տեղակալի կողմից որոշում է կայացվել Գ.Ա.-ին ՀՀ քրեական օրենսգրքի 327-րդ հոդվածի 2-րդ մասի 2-րդ կետով որպես մեղադրյալ ներգրավելու մասին՝ այն բանի համար, որ 2016թ. կցագրված լինելով Կոտայքի զինկոմիսարիատում՝ քննությամբ չպարզված ժամանակում և հանգամանքներում, դեռևս ինքնությունը չպարզված անձից օգտագործելու նպատակով ձեռք է բերել մագնիսա-ռեզոնանսային տոմոգրաֆիա կատարելու վերաբերյալ հետազոտման կեղծված ակտի պատճենը, որում առկա է եղել իր առողջական վիճակին ակնհայտորեն չհամապատասխանող ախտորոշումներով եզրակացություն: Ապա, հաստատապես իմանալով, որ այն հանդիսանում է կեղծ փաստաթուղթ, նախ ներկայացրել է զինկոմիսարիատ, այնուհետև կենտրոնական բժշկական հանձնաժողովին և փաստաթղթեր կեղծելու ճանապարհով ճանաչվել է զինվորական ծառայության համար ոչ պիտանի՝ հաշվառվել պահեստազորում՝ այդ կերպ խուսափելով ժամկետային զինվորական ծառայության հերթական զորակոչից:

Գործով մինչդատական քրեական վարույթի նկատմամբ հսկողություն իրականացնող դատախազի կողմից ցուցում է տրվել Գ.Ա.-ին ՀՀ քրեական օրենսգրքի 327-րդ հոդվածի 2-րդ մասի 2-րդ կետով մեղադրանք առաջադրելու և նրա նկատմամբ կալանավորումը որպես խափանման միջոց ընտրելու միջնորդությամբ Երևան քաղաքի ընդհանուր իրավասության առաջին ատյանի դատարան դիմելու մասին: Դատախազի ցուցումի պահանջների կատարման շրջանակներում մայիսի 21-ին Գ.Ա.-ին նշված հոդվածով առաջադրվել է մեղադրանք: Նույն օրը քննիչի կողմից միջնորդություն է հարուցվել Երևան քաղաքի ընդհանուր իրավասության առաջին ատյանի դատարան` նրա նկատմամբ 2 ամիս ժամկետով կալանավորումը որպես խափանման միջոց ընտրելու մասին, որը բավարարվել է: Քրեական գործով նախաքննությունը շարունակվում է, ձեռնարկվում են մեծածավալ օպերատիվ, քննչական և այլ դատավարական գործողություններ ինչպես գործի լրիվ հանգամանքները բացահայտելու, այնպես էլ հանցանք կատարած մյուս անձանց ինքնությունները պարզելու ուղղությամբ:

Ինչպես հայտնում է ֆոտոլրագրող Գագիկ Շամշյանը, կալանավորվածը Ծաղկաձորի նախկին քաղաքապետ Գարուն Միրզոյանի տղան է՝ 19-ամյա Վարդան Միրզոյանը։

Մանրամասները՝ shamshyan.com

***

Քիչ առաջ SHAMSHYAN.com է զանգահարել փաստաբանների պալատի անդամ, փաստաբան Զորայր Հարությունյանը և հայտնել, որ Ծաղկաձորի նախկին քաղաքապետ Գարուն Միրզոյանի որդին՝ Վարդան Միրզոյանը կալանավորված չէ, իրավական ոչ մի կարգավիճակ դեռևս չունի և որպես պահանջ ներկայացնում է իր խոսքը, որը ներկայացնում ենք ստորև.

Միրզոյան ընտանիքի անունից լիազորված եմ հայտնելու, որ Գարուն Միրզոյանի որդին` Վարդան Միրզոյանը ոչ միայն կալանավորված չէ, այլ անգամ որևէ դատավարական կարգավիճակ չունի: Վարդան Միրզոյանը հանդիսանում է Հայաստանում Ամերիկյան Համալսարանի ուսանող և զբաղված է իր քննաշրջանով: Խիստ մտահոգիչ է, որ նման պայմաններում լրատվական ծառայությունը տարածում է իրականությանը չհամապատասխանող տեղեկատվություն: Հայտնեմ նաև, որ դիմել ենք իրավասու մարմիններին հայտնելով Միրզոյան ընտանիքի անդամներից ցանկացածի մասով` ցանկացած քրեական գործով, ցանկացած դատավարական կարգավիճակով, ցանկացած դատավարական գործողությանը մասնակցելու պատրաստակամության մասին, այդպիսի անհրաժեշտություն ծագելուն պես:

Հարգանքով՝ Զորայր Հարությունյան

Այս խորագրի վերջին նյութերը