Երբ երկրի վարչապետը սկսեց ոչ նորմատիվային լեքսիկոնով խոսել այլախոհների մասին, հայհոյանքը համացանցում ավելացան: Մեր մոնիթորինգի նախնական արդյունքներով, երբ Նիկոլ Փաշինյանը խոսում էր «ասֆալտին փռելու, պատերին ծեփելու» մասին, համացանցում հայհոյանքն ավելացան 200 տոկոսով:

«Բռնության և ատելության խոսքը» թեմայով կլոր սեղան-քննարկման ժամանակ այս մասին ասաց «Քաղաքացիական գիտակցություն» ՀԿ նախագահ Նարեկ Սամսոնյանը:

«Սա էլ կոնկրետ տեխնոլոգիա է, և սա կենտրոնացված ղեկավարվել ու ղեկավարվում է, մեր տվյալներով, հանրային կապերի և տեղեկատվական ՊՈԱԿ-ի միջոցով: Ֆեյքերն ու ֆեյք էջերը, որոնք բազմաթիվ են, համացանցում ստեղծում են անհանդուրժողականության մթնոլորտ, որը դրսևորվում է հայհոյանքով: Ինչ-որ մի ֆեյք էջ սկսում է հայհոյել անընդհատ, ինքը սկսում է թիրախավորել ու հայհոյել: Ինքը մի լայվի տակ սկսում է ստեղծել մի իրավիճակ, երբ բոլորը սկսում են հայհոյել: Մեր տվյալներով՝ 12.000 ֆեյք կա ու դրանք բացառապես զբաղված են եղել համացանցում հայհոյելով»,-ասաց նա:

Նարեկ Սամսոնյանի խոսքով՝ իրենք առանձնացրել են համացանցում հայհոյող կեղծ օգտատերերին. «Երբ ինչ-որ ժամանակահատված եղավ, որ Նիկոլ Փաշինյանի թիմում եղան խնդիրներ, այդ նույն ֆեյքերը սկսեցին իրար դեմ ելնել: Այսինքն՝ պարզ էր դառնում, թե այդ ֆեյքերը որ պատգամավորի աշխատասենյակից էին գործում: Մենք դա հրապարակեցինք, իհարկե, լուրջ արձագանք չեղավ, սակայն, եթե ուշադիր լինեք, Նիկոլ Փաշինյանը դադարեց խոսել ֆեյքերի մասին»:

Սամսոնյանը նաև նշեց, որ երկու ամիս առաջ Հայաստանում ամեն 3-րդ կինը (իրական օգտատեր), որը պաշտպանում էր վարչապետ Նիկոլ Փաշինյանին, հայհոյանք էր գրում. «Մենք պարբերաբար հրապարակում ենք այդ կանանց էջերն ու հայհոյանքներով մեկնաբանություններն ու այսօր նրանց թիվը կրճատվել է ու ամեն 5-րդ կին-իրական օգտատերն է մեկնաբանություններում գրում սեռական բնույթի հայհոյանքներ: Եղել են դեպքեր, երբ զանգում էին մեր խմբագրություն ու ասում՝ ջնջեք այդ հրապարակումները, որովհետև ամուսինները չգիտեին, որ իրենց կանայք հայհոյում էին համացանցում: Մեր հրապարակումներից հետո այդ կանանց մեծ մասն այլևս չի հայհոյում համացանցում»:

Աղբյուրը՝ Tert.am