Տնտեսական

20.05.2011 15:42


Այս տարի ևս կարտոֆիլի արժեքը շատ բարձր կլինի

Այս տարի ևս կարտոֆիլի արժեքը շատ բարձր կլինի

Չնայած կառավարության այն հավաստիացումներին, թե գյուղատնտեսական մթերքի շուկայում իրավիճակը շատ շուտով կարգավորվելու է, սակայն գործնականում հակառակ պատկերն է: Գյումրու շուկայում ներկայումս կարտոֆիլի գները, մեղմ ասած, զարմացնում են: Անցած տարի ամբարած կարտոֆիլի 1 կգ–ը վաճառվում է 350-500 դրամի սահմաններում, իսկ նոր բերքի 1 կգ–ն արժե 800 դրամ, այն դեպքում, երբ Շիրակի մարզը համարվում է կարտոֆիլի մշակման կենտրոն, և երբևիցե մարզում կարտոֆիլի պակասություն չի զգացվել:

Սակայն իրավիճակը կարտոֆիլի շուկայում բարդանում է նաև այն պատճառով, որ սերմացուն այս տարի բավական թանկ արժե՝ առաջին կարգի 1 կգ սերմացուն հողագործները հնարավորություն ունեն  ձեռք բերելու 800-1000 դրամով: Այս պատճառով Շիրակի մարզի գյուղերում շատերը հրաժարվում են կարտոֆիլ ցանելուց։

–Այս տարի սերմնացուն 800 դրամ է, որտեղի՞ց ցանենք: Ազատանի առաջին հանքի սերմը 800-1000 դրամ է: Մենք բազմանդամ ընտանիք ենք, ամեն տարի կարտոֆիլ ենք ցանելը, որը մեզ բավականացրել է, էս տարի ստիպված կանաչեղեն ենք ցանելու,–ասել է Ախուրյան համայնքի բնակիչ Ալվինա Բաղդասարյանը:

Վերջինս նաև համոզված է, որ այս տարի ևս բնակչությունը կարտոֆիլի համար շատ թանկ է վճարելու։

–Այս տարի էլ, հավանաբար, կարտոֆիլը շատ թանկ կլինի, որովհետև ցանողները շատ քիչ են: Եկամուտ չեն ստանում, չեն ցանում: Կառավարությունը նստած, չգիտես ինչ մասին է մտածում. թող կարտոֆիլի էժան սերմացու բերեին ու բաժանեին գյուղացիներին, որ ձմռանը ազգաբնակչությունը անցած տարվա նման կարտոֆիլի գներից հանկարծակիի չգա,–նշել է Ալվինա Բաղդասարյանը:

Դերենիկ Մալխասյան

Գյումրի

Այս խորագրի վերջին նյութերը