Վրաստանի խորհրդարանը երեքշաբթի՝ մարտի 20–ին, կքննարկի կառավարությանը վստահություն հայտնելու հարցը։ Այդ հարցը քննարկվելու է խորհրդարանի արտահերթ նիատի ժամանակ։

Գերագույն օրենսդիր մարմնի կողմից գործադիր իշխանությանը վստահություն հայտնելու անհրաժեշտությունը օրակարգ է մտել աշխատանքի, առողջապահության և սոցիալական պաշտպանության նախարար Անդրիյա Ուրուշաձեի փոխարեն ուրիշին նշանակելու պատճառով։ Նա կառավարության կողմից փոխարինված արդեն 7–րդ նախարարն է, իսկ դա պահանջում է կառավարությանը կրկին վստահություն հայտնելու ընթացակարգ։

Անդրիյա Ուրուշաձեին կփոխարինի Զուրաբ Չիաբերաշվիլին։ Ուրուշաձեն նշանակվել է Թբիլիսիի քաղաքապետի հասարակական հարցերով տեղակալ։

Վրաստանում գործող օրենսդրության համաձայն՝ կառավարության կազմի 1/3–ի փոփոխության պարագայում (բայց 5 հոգուց ոչ պակաս) նախագահը կադրային փոփոխություններից հետո մեկ շաբաթվա ընթացքում պետք է ներկայացնի ողջ կառավարությունը՝ խարհրդարանի վստահությունը ստանալու նպատակով։