Աշխարհ

24.04.2012 11:59


Հունգարիան դուրս է գալիս Nabucco–ից

Հունգարիան դուրս է գալիս Nabucco–ից

Արևմտյան լրատվամիջոցները հայտնում են, որ Հունգարիայի վարչապետ Վիկտոր Օրբանը Բրյուսելում հայտարարել է, թե հունգարական նավթագազային MOL ընկերությունը դուրս է գալիս Nabucco գազամուղային նախագծից։ Ըստ Օրբանի՝ դժվարություններ են առաջանում նախագիծը իրականացնելու հարցում, այդ պատճառով էլ MOL-ը դուրս է գալիս դրանից:

Ընկերության հայտարարության համաձայն` բազմաթիվ անորոշություններ կան Nabucco նախագծի շուրջը, որոնք դժվար է անտեսել, մասնավորապես` գազամուղի արժեքն անընդհատ աճում է: 

Nabucco-ի մրցակից է համարվում Հարավային հոսք գազամուղը, որով Ռուսաստանն առանց միջնորդների գազ պետք է մատակարարի Բալկաններ ու Հարավային Եվրոպա:

Հունգարիայի վարչապետը հայտարարել է, որ Ռուսաստանն ավելի մեծ ակտիվություն է ցուցաբերում Հարավային հոսք ծրագրի իրականացման հարցում, որը նույնպես պետք է անցնի Հունգարիայով: Նրա խոսքով` Հունգարիայի համար գոյություն ունեն պարզ տնտեսական պատճառներ ռուսական նախագծին մասնակցելու համար:

Հիշեցնենք, որ Nabucco գազամուղով Կասպից ծովից ադրբեջանական և թուրքմենական գազը պետք է Թուրքիայով, Բուլղարիայով, Ռումինիայով, Հունգարիայով և Ավստրիայով տեղափոխվի Եվրոպա:

Այս խորագրի վերջին նյութերը