Ինչպես տեղեկացրել ենք, խորհրդարանը քննարկում է «Սևանա լճի մասին» ՀՀ օրենքում լրացում կատարելու մասին վիճահարույց օրինագիծը։ Արձագանքելով ՀՀ տարածքային կառավարման նախարարության ջրային տնտեսության պետական կոմիտեի նախագահ Անդրանիկ Անդրեասյանի հայտարարությանը, թե ի զարմանս կառավարության՝ 2012թ. սակավաջուր տարի էր, ՀՅԴ խմբակցության ղեկավար Արմեն Ռուստամյանը նկատել է.

–Նույնիսկ բնությունն է երես թեքել այս կառավարությունից։

Ռուստամյանը նաև հետաքրքրվել է, արդյոք այ՞ն պատճառով է, որ կառավարությունը ջրառատ տարի է կանխատեսել, ջրամբարներից ջուր է բաց թողել, իսկ այժմ էլ փաստի առջև է կանգնել և դեֆիցիտը լրացնելու համար ցանկանում է Սևանա լճից 150 մլն խորանարդ մետր լրացուցիչ ջրառ կատարել։

–Այո՛, ցավոք սրտի՝ գործադիրը ոչ բոլոր բնական երևույթներն է կարողանում կարգավորել։ Կարծում եմ՝ ոչ միայն մենք, այլ Հայոց աշխարհում մեծամասնությունը կարծում է, որ հեղեղներ պետք է լինեին, որովհետև այն ձնային տեսքով տեղումները, որ տեղի ունեցան, առողջ դատողությունն ասում էր, որ դրանք պետք է դառնային ջրային հոսքեր և լցնեին մեր ռեզերվուարները։ Ցավոք, այդպես տեղի չունեցավ։ Իսկ մնացածը, մնացածը, մնացածը... կարծում եմ, ունենք այն, ինչ ունենք,–պատասխանել է Անդրանիկ Անդրեասյանը։

ՀՅԴ պատգամավոր Վահան Հովհաննիսյանն էլ ընդգծել է, որ նախընտրական շրջանում հայի խելքն ամեն ինչի է ընդունակ, և նույնիսկ ջուրն է դիտարկվում որպես ընտրակաշառք։

7or.am