ՀՀ նախագահի թեկնածու, «Ազգային համաձայնություն» կուսակցության նախագահ Արամ Հարությունյանը  Պարույր Հայրիկյանի դեմ իրականացված մահափորձի և դա դրսից պատվիրված լինելու մասին խոսելով՝ նշել է.

–Նման անպատասխանատու հայտարարություն անելը քաղաքական ավանտյուրա է, դավաճանություն, հակառուսական և հակապետական քայլ: Ի դեպ, եթե քիլլերի դեմքը տեսնում են,  նա մինչև վերջին  փամփուշտը դատարկում է։ Նաև, ռուսական ծառայություններն այդքան անորա՞կ են, որ մի մետրից վրիպեն։

Ա. Հարությունյանի զարմանքն է առաջացրել, որ ոչ միայն բուն մահափորձը, այլ նաև վերոնշյալ վարկածը շատ ակտիվ լուսաբանվել է լրատվամիջոցների կողմից։

–Պարույր Հայրիկյանին երգչուհի Լիլիթ Հովհաննիսյանից շատ են ցույց տալիս հեռուստացույցով: Սերժ Սարգսյանին շնորհավորող էր պետք, և այսօր կա այդ մարդը՝ Պարույր Հայրիկյանը: Երևի Րաֆֆու վրա սկսեցին կասկածել, որ կշնորհավորի:

Նախագահի թեկնածուն կողմ է, որ Պարույր Հայրիկյանը դիմի ՍԴ և ընտրությունները 40 օրով հետաձգի.

–Եթե Հայրիկյանի առաջին առաքելությունը կապում ենք անկախության հետ, ապա երկրորդը կլինի նախագահական ընտրությունների հետաձգումը։ Այդպիսով՝ մենք ժամանակ կունենանք հասկանալու, թե ինչ է կատարվում: Միգուցե պետությունը պատրաստ չէր ընտրություններ անցկացնելուն: Բացի այդ, Սերժ Սարգսյանի լիազորությունների ժամկետը կլրանա, իսկ մրցակցության առումով շատ կարևոր է, որ թեկնածուներից մեկը գործող նախագահը չլինի:

7or.am