Ազգային ժողովի ՀԱԿ խմբակցության ղեկավար Լևոն Զուրաբյանն այսօր խորհրդարանում պատասխանել է լրագրողների հարցերին։ Նա հրաժարվել է ներկայացնել Երևանի ավագանու ընտրություններում իրենց ցուցակում ընդգրկված կամ ընդգրկվելիք մարդկանց անունները։ Լևոն Զուրաբյանը վստահ է, որ ժողովրդի համբերության բաժակը լցված է, և «բոլորը հասկանում են, որ լուրջ գործընթացներ են պետք այս բռնապետությունից ազատվելու համար»:

–Շատ լուրջ քայլ կլինի, եթե այս բռնապետությունից խլենք քաղաքապետարանը,-ընդգծել է նա՝ միաժամանակ շատ կարևոր համարելով ընդդիմության միավորումը հատկապես ընտրատեղամասերում ընտրության գործընթացը միասին վերահսկելու, միմյանց հասցեին քննադատություն չհնչեցնելու և հակաքարոզչություն չանելու հարցերում։

–Ես ռեալ եմ համարում, որ մենք կարող ենք Սերժ Սարգսյանից խլել քաղաքապետարանը, եթե բոլոր քաղաքական ուժերը միավորվեն,–նշել է նա:

7or.am