Այսօր առավոտյան ԱԺ նախագահ Հովիկ Աբրահամյանի մոտ ԱԺ խմբակցությունների ղեկավարները խորհրդակցություն են անցկացրել և քննարկել խորհրդարանական վեհաժողովներում պատվիրակությունների ձևավորման նոր կանոնակարգը։ «Ժառանգություն» խմբակցության անունից, սակայն, այդ հանդիպմանը մասնակցել է ոչ թե խմբակցության ղեկավար Ռուբիկ Հակոբյանը, այլ Զարուհի Փոստանջյանը։

Հիշեցնենք, որ Ռ. Հակոբյանը հրաժարվել է «Ժառանգություն» խմբակցության ղեկավարի պաշտոնից։

Նա բավականին ուշ է գնացել ԱԺ և հրաժարվել է լրագրողներին պարզաբանումներ ներկայացնել։ Իսկ Հովիկ Աբրահամյանի աշխատասենյակից դուրս գալուց հետո Զ. Փոստանջյանը, «7օր»–ի հարցին ի պատասխան, ասել է.

–Ե՛վ խմբակցությունների ղեկավարները, և՛ քարտուղարները իրավասու են մասնակցել նման քննարկումներին։

Թե որն է Ռ. Հակոբյանի հրաժարականի պատճառը, Զ. Փոստանջյանն ասել է.

–Չգիտեմ, երևի ծանրաբեռնվածությունն է։ Մեր մեջ կոնֆլիկտ չի եղել։

Նա նաև պնդել է, որ «Ժառանգություն» կուսակցությունն ինքը չի ուզում ղեկավարել, իսկ 2014-ին արու զավակ ունենալու ցանկություն ունի՛։

Ի դեպ, «Ժառանգություն» խմբակցությունում այսօր խառնաշփոթ իրավիճակ է։ Բոլորը հրաժարվում են լրագրողների հարցերին պատասխանելուց։ ԱԺ է այցելել նաև «Ժառանգության» նախկին պատգամավոր Արմեն Մարտիրոսյանը։

–Մամուլից եմ տեղեկացել, եկել եմ տեսնեմ՝ ինչ է տեղի ունեցել,–ասել է նա։

7or.am