Zham.am-ի հարցազրույցը ՀՀ ԱԺ ԲՀԿ խմբակցության պատգամավոր Էլինար Վարդանյանի հետ.
- Տիկի՛ն Վարդանյան, երեկ լրատվամիջոցների հետ հանդիպման ժամանակ «Ժառանգություն» կուսակցության ղեկավար Րաֆֆի Հովհաննիսյանը, խոսելով սահմանադրական բարեփոխումների մասին, այդ բարեփոխումները պատրանք անվանեց, «ժողովրդին շեղելու փորձ» և հայտարարեց, որ Հայաստանին Սահմանադրության փոփոխություններ պետք չեն, և դրանք չեն բխում ՀՀ քաղաքացիների շահերից: Ինչպե՞ս եք վերաբերվում այդ տեսակետին:

- Ես լիովին կիսում եմ Րաֆիի Հովհաննիսյանի Ձեր կողմից մատնանշած բնորոշումները: Իրականում այսօր Սահմանադրական բարեփոխումների հասարակական պահանջարկ չկա. սա արհեստական օրակարգ է, և պատահական չէ, որ շատերի մոտ այն հիմնավոր կասկածներ է առաջացնում: Խոսել սահմանադրական փոփոխությունների մասին այն պահին, երբ միջազգային տարբեր հեղինակավոր կառույցների կողմից հետազոտությունների արդյունքում Հայաստանի տնտեսությունը իր «պատվավոր» տեղն է զբաղեցնում աշխարհի վատագույն տնտեսությունների առաջին հորիզոնականներում, երբ արտագաղթն այնպիսի ահագնացող տեմպերի է հասել, որ դրա մասին կրկին բարձրաձայնելը դեժավյուի տպավորություն է թողնում, երբ բարեկեցությունը շատերի համար այլևս անիրատեսական է թվում, իմ գնահատմամբ, չի տեղավորվում բանականության շրջանակներում: Կարծում եք՝ այս բոլոր խնդիրների լուծումը սահմանադրական բարեփոխումներո՞վ է պայմանավորված, իհա՛րկե ոչ:
-Դուք խոսեցիք հասարակական պահանջի մասին, բայց այսօր սահմանադրական բարեփոխումների վերաբերյալ հանրային քննարկումներ են ընթանում ՀՀ տարբեր մարզերում:

- Ինձ համար դա հերթական զավեշտներից մեկն է: Եվ ես, իհարկե, լավ հասկանում եմ, որ դա իմիտացիա ստեղծելու նպատակ ունի, և կարծում եմ՝ ՀՀ քաղաքացիներն էլ միամիտ չեն, և ամեն ինչ շատ ճիշտ գնահատում են: Ինչպե՞ս եք պատկերացնում այդ քննարկումները մարզերում, երբ այսօր մարզերի բնակիչների գլխավոր խնդիրն է դարձել պաշտպանել իրենց տնտեսությունը տարբեր բնական աղետներից՝ կարկուտից, քամուց, երբ մարզերի բնակիչների մեծ մասը արտագաղթել է Հայաստանից հացի խնդիր լուծելու համար, երբ սահմանամերձ բնակավայրերում մարդիկ ապրում են ամենօրյա գնդակոծությունների տակ: Հիմա ես եմ ուզում հարցնել՝ արդյոք այս մարդկանց որևէ կերպ մտահոգո՞ւմ է կամ կմտահոգի՞ Սահմանադրությունը, արդյոք այս մարդիկ իրենց խնդիրների լուծումը կապո՞ւմ են Սահմանադրության փոփոխությունների հետ: Ո՞ւմ ենք փորձում խաբել՝ ինքներս մե՞զ:

- Իսկ ինչպիսի՞ն է Ձե՛ր դիրքորոշումը սահմանադրական բարեփոխումների բովանդակության վերաբերյալ:
- Գիտեք՝ ես երբևէ չեմ անդրադարձել փոփոխությունների բովանդակությանը, և այս անգամ ևս զերծ կմնամ այն քննարկելուց: Այս պահին փոփոխությունները արհեստական օրակարգ ստեղծելու նպատակ ունեն, ուստի անիմաստ է մտնել բովանդակային քննարկման մեջ:
Կարծում եմ, որ ցանկացած գաղափար կարող է քննարկման առարկա դառնալ, բայց դա պետք է արվի ճիշտ պահին, գուցե չորս-հինգ տարի անց, այլ մթնոլորտում, տնտեսական զարգացման այլ աստիճանում: Նախաձեռնել Սահմանադրության փոփոխություններ ընդունելի է միայն համերաշխության մթնոլորտում, այլ ոչ թե կասկածների, ինչպիսին առկա է այսօր:
Երևի թե կկրկնվեմ, բայց սահմանադրական բարեփոխումներ պետք է կատարվեն միայն այն պահին, երբ առկա է դրանց հասարակական պահանջարկը: Մի առիթով պարոն Ծառուկյանը տվել էր հետևյալ բնորոշ ձևակերպումը, որ աշխատանքից հետո, երբ մարդ գնում է տուն, ուզում է տուն տանել երեխաների համար սնունդ, ծերերի համար՝ դեղորայք, և այդ պահին նրան ամենևին էլ չի մտահոգում Սահմանադրությունը: Եվ ես առաջարկել եմ և առաջարկելու եմ, որպեսզի ԲՀԿ-ն աշնանը Երևանում և մարզերում կազմակերպի հանահավաքներ՝ հասկանալու ժողովրդի մոտեցումը, լսելու նրանց մտահոգությունները և տեսակետը սահմանադրական փոփոխությունների վերաբերյալ: Պետք է անմիջապես ժողովրդից հարցնել՝ արդյոք այսօր իրենց առջև ծառացած աշխատանքի, զբաղվածության խնդիրը, գազի և էլեկտրաէներգիայի համար վճարումների ծանր բեռը, աղետներից կրած վնասները պայմանավորվա՞ծ են սահմանադրական փոփոխություններով: Պետք է անմիջապես ժողովրդից լսել՝ արդյոք այսօր վերջիններս սպասո՞ւմ են սոցիալ-տնտեսական վիճակի անհապաղ կարգավորման, արդարության վերականգնման, արտագաղթի կանխման, աղքատության վերացման, թե՞ սահմանադրական փոփոխությունների:
Zham.am