Հարցազրույց «Միավորված աշխատանքային կուսակցության» նախագահ Գուրգեն Արսենյանի հետ

-Ձեր կարծիքով օբյեկտի՞վ էր մարտիմեկյան ժամանակավոր հանձնաժողովի ներկայացրած եզրակացությունը, որի անդամն եք նաև Դուք։

-Հարյուր տոկոսանոց օբյեկտիվություն չի կարող լինել։ Ե՛վ իրադարձության մասնակիցները, և՛ հանձնաժողովականներն ինչ-որ չափով կողմ են եղել այս ամենին։ Մենք պետք է ձգտենք հասնել օբյեկտիվության։ Փաստաթուղթը կա. այն հրապարակային բնույթ ունի։ Հասարակության ամեն անդամ կարող է ծանոթանալ այս թղթին և իր հետևություններն անել։ Ամեն մեկը կարող է գտնել այն, ինչ որ փնտրում է այս թղթում՝ և՛ մեր մոտեցումները, և՛ գնահատականները, որ տրված են իրադարձությունների մասնակիցների և այդ հարցով զբաղվողների կողմից։ Դրա համար այն կոչվում է մասնակի սուբյեկտիվություն։ Բացառիկ անաչառ մարդ չի կարող լինել, առավել ևս, որ հանձնաժողովի կազմում է և մասնակցել է քաղաքական իրադարձություններին՝ նախագահական ինստիտուտի ձևավորմանը՝ որպես կողմերից մեկին սատարող։

-Ի՞նչ եք կարծում, հասարակությունը գոհ կլինի՞ այս զեկույցից։

-Հասարակությունը չի կարող գոհ լինել այս եզրակացությունից և գնահատականներից, որովհետև մի քանի կարևոր հարցերի պատասխաններ հանձնաժողովը չի տվել։

-Որո՞նք են չտրված պատասխանները։

-Մահվան հանգամանքները։ Ինչպե՞ս և ինչո՞ւ։

-Պարո՛ն Արսենյան, ե՞րբ եք պատրաստվում վերադառնալ ակտիվ քաղաքականություն։

-Ես մեծ քաղաքականությունից ընդհանրապես չեմ հեռացել, պարզապես պաշտոնական կարգավիճակի խնդիրն է, որ Ազգային ժողովում ներկայացված չեմ։

-Իսկ ե՞րբ կլինեք խորհրդարանում։

-Նվազագույնը մինչև հաջորդ ընտրությունները։ Հայաստանի հասարակության աջակցությունը եթե լինի, կլինեմ խորհրդարանում։

-ՀՀ նախագահի հետ հանդիպման ժամանակ հասցրեցի՞ք ներկայացնել Ձեր դիրքորոշումները Հայաստանի և Թուրքիայի արտգործնախարարությունների միջև նախաստորագրված արձանագրությունների վերաբերյալ։

-Այո՛, ներկայացրել եմ։ Հանդիպման ժամանակ քաղաքական կառույցների ղեկավարների ելույթով հասարակության տրամադրություններն էին ստուգվում։ Մեր մոտեցումները մենք շարադրել ենք։

-Ի՞նչ եք կարծում, խորհրդարանը կվավերացնի՞ այդ արձանագրությունները։

-Եթե խորհրդարանը գտնի, որ այդ արձանագրություններով Հայաստանի Հանրապետության կենսական շահերին ոչ մի վտանգ չի սպառնում, ապա կվավերացնի այն։

-Իսկ Դուք վտանգ տեսնո՞ւմ եք։

-Առայժմ՝ ոչ։

-Մեկ այլ թեմայի շուրջ. ինչպե՞ս եք գնահատում ներկա տնտեսական քաղաքականությունը և վարչապետի քայլերը։

-Բացասական։

Զրույցը վարեց Սյուզի Մելքոնյանը