Ամերիկյան Միսսուրիի նահանգապետ Ջեյ Նիքսոնը կարգադրել է անկարգություններով համակված Ֆերգյուսոն քաղաք ուղղել ազգային գվարդիայի լրացուցիչ ուժեր։ Այս մասին հաղորդել է նահանգապետարանը։
Ազգային գվարդիայի մարտիկներն արդեն հսկում են քաղաքը, որի բնակիչները բողոքում են ատենակալների որոշման դեմ՝ դատական պատասխանատվության չենթարկելու ոստիկան Դարրեն Ուիլսոնին, որն ամռանը սպանել է 18-ամյա աֆրոամերիկացի Մայքլ Բրաունին։
Տեղական ոստիկանության ներկայացուցիչների տվյալներով` նախորդ գիշեր 29 մարդ է ձերբակալվել։
Սենթ–Լուի շրջանի ոստիկանապետ Ջոն Բելմարի խոսքերով՝ իրավիճակը, որն առկա է քաղաքում, շատ ավելի վատ է, քան օգոստոսին. մեկ գիշերվա ընթացքում նա 150 կրակոց է լսել։
Քաղաքում տասից ավելի շենք է այրվում, այդ թվում՝ պահեստներ, ավտոպահեստամասերի խանութներ։ Կրակոցների պատճառով հրշեջները չեն կարողանում մոտենալ այրվող շենքերին, որպեսզի հանգցնեն դրանք։
Նախորդ շաբաթ Միսսուրիի նահանգապետ Ջեյ Նիքսոնը հայտարարել էր արտակարգ իրավիճակ մտցնելու մասին։

Տեղեկացնում է «ՏԱՍՍ»–ը։