Երեւանի քաղաքապետ Տարոն Մարգարյանի՝ ավագանու երեկվա նիստում բռնած դիրքը սա է նշանակում:

Սեփական աշխատավարձը, իր տեղակալների, վարչական շրջանների ղեկավարների, քաղաքապետարանի աշխատակիցների աշխատավարձերը բարձրացնելու մասին Տարոն Մարգարյանի որոշումը աբսուրդի ժանրից է:

Նրա այս քայլը հիշեցնում է հայտնի ասացվածքը՝ «Բոշի յուղը շատ ա լինում՝ քսում է…»:

Պարզվում է՝ քաղաքապետարանի եկամուտներն այնքան շատ են, որ կարելի է բարձրացնել սեփական աշխատավարձերը:

Իսկ ա՛յ, սոցիալ-տնտեսական խնդիրները լուծել չարժե:

Ասենք, այդ եկամուտներով պետք չէ աշխատատեղեր ստեղծել, օգնել անապահով ընտանիքներին, ապահովել ամենաէականը՝ քաղաքացի-քաղաքապետարան կապը, ինչը բացակայում է, քանի որ «մեկ պատուհան» սկզբունքը դարձել է ֆիկցիա:

«Բոշի յուղը» որոշել են քսել իրենց մարմնի՝ առանց այն էլ հաստացած հատվածին:

Խե՜ղճ երիտասարդ քաղաքապետը մի կերպ է յոլա գնում, բա ուրիշ ինչպես իր վիճակը բարելավի։

Չնայած, սեփական փիառի համար նա Երեւան է բերում ռուսական «պոպսա»-ի թանկարժեք «աստղերի»՝ բրեժնեւաներից մինչեւ վոլոչկովաներ, նկարահանող խմբեր է ուղարկում ՌԴ տարբեր քաղաքներ, որոնք տեսաձայնագրում են այդ քաղաքների ղեկավարներին, վերջիններս գովերգում են իրեն՝ Տարոնին (ամեն տարի այդ ամենը ցուցադրվում է մայրաքաղաքի տոնին, տարբեր առիթներով, տարբեր եթերներով):

Ավելին՝ գրեթե ամեն օր տարբեր հեռուստաալիքներով Տարոն Մարգարյանին գովազդող տեսանյութեր են «ռասկրուտկա» արվում. բակեր է բարեկարգում, նույն փողոցում մեկ տարվա ընթացքում տասն անգամ ասֆալտ է փռում, գարեջրի փառատոններ ու շաբաթօրյակներ է անում:

Եթե քաղաքապետարանին հարցում անես՝ պարզելու, թե Տարոն Մարգարյանի աշխատանքային «բուռն գործունեության» ակտիվ հեռուստագովազդը ի՞նչ միջոցների հաշվին է իրականացվում, քեզ մի խուճուճ բացատրություն կտան, ինչից ոչինչ չես հասկանա: Իսկ այդ գովազդները (դատելով դրանց քանակից ու որակից) ակնհայտորեն հսկայական գումարներ են կազմում:

Պարզ է, որ սեփական փիառի վրա ծախսվող գումարների մեծ մասը Մարգարյանն իր անձնական միջոցներով է իրականացնում:

Եվ այսքանից հետո դեռ ուզում է իր աշխատավարձը էլի մի 70 հազարով բարձրացել՝ այն հասցնելով ավելի քան 570 հազարի:

Անհասկանալի է նաեւ քաղաքապետարանի ղեկավարության բացատրությունը իրենց աշխատակիցերի աշխատավարձերի բարձրացման վերաբերյալ:

Ասում են, թե բոլոր պետական աշխատողներինը բարձրացել է, մերն էլ պետք է բարձրանա:

Բայց նման որոշում Կառավարությունն ընդունել է անցյալ տարի, եւ այս տարվա հուլիսի 1-ից բարձրացել են կառավարման համակարգի աշխատակիցների աշխատավարձերը:

Ուրեմն, ի՞նչ. քաղաքապետարանի վրա դա չի՞ տարածվել: Իհարկե, տարածվել է:

Պարզապես, հիմա երկրորդ անգամ, եւ այս անգամ արդեն իրենց եկամուտների հաշվին են բարձրացում աշխատավարձերը: Մի խոսքով, իրենք իրենց հակասում են. մի դեպքում ասում են՝ քաղաքապետարանի եկամուտների հաշվին ենք բարձրացնում, իսկ հետո էլ, թե՝ քանի որ բարձրացել են բոլոր պետական աշխատողների աշխատավարձերը, մերն էլ պետք է բարձրանա:

Սա այն դեպքում, երբ, կրկնում ենք, սոցիալ-տնտեսական խնդիրների մեծ մասը լուծված չէ:

Իսկ քաղաքապետարանի աշխատակիցների աշխատավարձերն էլ բավական բարձր են:

Իսկ հետաքրքիր է՝ ի՞նչ եկամուտների մասին է խոսքը: Չլինի՞ կարմիր գծերից ու արագաչափերից գոյացած գումարների շնորհիվ են բարձրացնում սեփական աշխատավարձերը: Եթե այո, ապա ստացվում է, որ մայրաքաղաքի բնակիչներին ռեկետի ենթարկելու միջոցով հոգում են սեփական բարեկեցության հարցը՝ իրականում ոչինչ չանելով, ավելին՝ իրենց աշխատանքի «արդյունավետությամբ» վնասելով նույն այդ բնակչությանը:

Կիմա Եղիազարյան

Հ.Գ.։ Երբ քաղաքապետարանն ուզում էր թանկացնել քաղաքային տրանսպորտը, որպես հիմնավորում ներկայացնում էր այն հանգամանքը, որ ուղևորափոխադրման ինքնարժեքը բարձր է և չկան միջոցներ դոտացիայի համար։ Փաստորեն, սեփական աշխատավարձը բարձրացնելու համար միջոցներ կան, իսկ քաղաքային տրանսպորտի դոտացիայի համար՝ չկան։