Վերջին օրերին Հայաստանի քաղաքական դաշտում շատ ուշագրավ դեպքեր գրանցվեցին: Իրար հետևից, մի քանի օրվա ընթացքում հարձակումների ենթարկվեցին ազատամարտիկներ, ովքեր միացել էին համաժողովրդական շարժմանը ու իշխանափոխություն էին պահանջում` բողոքելով երկրում առկա սոցիալ-տնտեսական աղետալի վիճակից, և ընդդիմադիր գործիչներ, ովքեր արդեն կոնկրետ գործեղությունների են անցել` կարճ ժամանակում այդ իշխանափոխությանը հասնելու համար:
Ինչքան էլ իշխանությունները փորձեն այս ամենը ներկայացնել որպես զուտ պատահականություն կամ կենցաղային վիճաբանություն, բոլորը շատ լավ հասկանում են, որ իրականում դա եղել է մանրակրկիտ մշակված պլան: Իսկ հարձակումների թիվ մեկ նպատակը եղել է ազատամարտիկներին, ընդդիմադիր գործիչներին և ընդհանրապես` ողջ հանրությանը վախեցնելը: Իշխանություններն այս անօրինական քայլերին դիմել էին այն հույսով, որ դրանից հետո մյուս բողոքողները կվախենային և այլևս չէին շարունակի իրենց պայքարը:
Սակայն նրանց այդ «փայլուն» պլանը չի իրագործվել, ավելին` այն լրիվ հակառակ էֆեկտն է տվել, քանզի այժմ թե՛ հանրությունը, և թե՛ ընդդիմադիր գործիչներն է՛լ ավելի են համոզվել այն կարծիքում, որ այս ցինիկ ու անօրեն իշխանությունները պետք է օր առաջ լքեն իրենց պաշտոնները, այլապես` մենք կկորցնենք երկիրը:
Հ.Գ. Հարձակվողների ինքնություններն իրար հետևից բացահայտվեցին: Պարզվեց, որ ազատամարտիկներին ու ընդիմադիր գործիչներին «հայրենասիրական ապտակ» են տվել ինչ-որ խոպանչի-վարորդներ: Բայց դե իրականում բոլորն էլ շատ լավ գիտակցում են, որ առանց բարձրագույն հրահանգի կամ գոնե թույլտվության՝ նմանատիպ ցինիկ պլանը չէր կարող իրականացվել: Իսկ քանի որ այդ պլանը ձախողվեց, դրա գլխավոր անձը` Սերժ Սարգսյանն ինքն է վտանգի մեջ ընկել, որովհետև ժողովրդի ողջ զայրույթն առաջին հերթին նրա վրա է ուղղվելու:

Արմինե Ամիրյանի ֆեյսբուքյան էջից