Քիչ առաջ մեկնարկել է պատգամավորների 1/3–ի նախաձեռնությամբ հրավիրված՝ փոխարժեքի տատանման ու գնաճի վերահսկման հարցով արտահերթ նստաշրջանը։

ՀՀ ԱԺ նախագահ Գալուստ Սահակյանն առաջարկել է այդ նիստն անցկացնել փակ և առանց ընդմիջման։

ԲՀԿ խմբակցության պատգամավոր Միքայել Մելքումյանն էլ նշել է՝ հաշվի առնելով, որ ֆինանսական շուկային վերաբերող իրավիճակը վերաբերում է ամբողջ ժողովրդին, և այս քննարկումները կարող են առաջացնել որոշակի աժիոտաժային իրավիճակներ, ԲՀԿ–ն դեմ չէ փակ ձևաչափին։

–Դռնփակը չի նշանակում գաղտնի,–ընդգծել է Մ. Մելքումյանը։

Իսկ ՀՀԿ խմբակցության ղեկավար Վահրամ Բաղդասարյանն առաջարկել է արտահերթ նիստի ավարտին հաղորդում ընդունել և այն հրապարակել։

Արտահերթը փակ և առանց ընդմիջման անցկացնելուն կողմ է քվեարկել 75, դեմ՝ 6, ձեռնպահ՝ 1 պատգամավոր։

7or.am