Այսօրվա ասուլիսին ՀՀ ԱԺ ԲՀԿ խմբակցության պատգամավոր Միքայել Մելքումյանն անդրադառնալով Հայաստանում առկա ֆինանսական իրավիճակին՝ նշել է, որ այն աննախադեպ է, և դրամի արժեզրկումն անդրադարձավ բոլոր շերտերի վրա. «Որպեսզի մենք այլևս թույլ չտանք, որ այսպիսի վայրիվերումներ լինեն, անհայտության, անորոշության, անելանելիության մթնոլորտ առաջանա, դեռևս 2012թ. խորհրդարանական ընտրություններից հետո ասում էինք, որ պետք է գնալ այլ ուղղությամբ, որ երկիրը շեղվել է իր բնականոն ճանապարհից։ Մենք արդեն զգում էինք և՛ մասնագիտորեն, և՛ քաղաքական լուծումների առումով, որ ինչ-որ բան պետք է կատարվի»։

Ըստ Միքայել Մելքումյանի՝ դրամի արժեզրկումը պայմանավորված է երկու հանգամանքով՝ արտաքին ազդեցությամբ և երկրում առկա տնտեսական իրավիճակով։

«Ո՞նց ենք տանում տնտեսական քաղաքականությունը, որ քո երկրի տնտեսության դիմադրողականությունը համարյա զրոյական է։ Եվ դրա շարժառիթները, գործոններն ակնհայտ բաներ չէին։ Բոլորս գիտեինք, որ վերջին 2-3 տարվա ընթացքում Հայաստանում այլևս ներդրումներ չեն կատարվում», – ասել է ԲՀԿ–ական պատգամավորը։

Մելքումյանն ընդգծել է, որ երկրի տնտեսությանը ներդրումներն առավել քան անհրաժեշտ են.

«Ոչ թե կոսմետիկ, հատվածային փոփոխություններ են պետք, այլ արմատական, խորքային փոփոխություն է անհրաժեշտ մեր երկրին։ Եվ քանի որ մենք գնում ենք 2015 թվական, ես սպասում եմ, որ այդ փոփոխությունները մենք ձեզ հետ միասին ենք անելու»։

Պատգամավորը տեղեկացրել է նաև, որ ՀՀ ԱԺ արտահերթ նիստին նախորդել է Գագիկ Ծառուկյանի հետ խորհրդակցությունը. «Մենք՝ որպես ոչիշխանական քաղաքական ուժ, մեր մյուս ոչիշխանական գործընկերների հետ լուրջ պատասխանատվություն էինք զգում այս երկրի առջև, որ մենք ունենք պատասխանատվություն՝ վիճակը ինչ-որ չափով մեղմացնելու կամ պարզեցնելու», – ասել է պատգամավորը։

7or.am