«Ժառանգություն» կուսակցության փոխնախագահ Արմեն Մարտիրոսյանն այսօր հրավիրված ասուլիսում ամփոփել է անցնող քաղաքական տարին։ Նա 2014թ. հաջողված տարի չի համարում արտագաղթի առկայության պատճառով, բայց և, որպես ներքաղաքական դրական փաստ՝ հիշեցնում է ԲՀԿ–ի, ՀԱԿ–ի և «Ժառանգության» հրավիրած «երկու հիանալի հանրահավաքները», դրանց ճնշման արդյունքում իշխանության կողմից 12 կետերի շուրջ քննարկումների գնալու պատրաստակամությունը, սահմանադրական փոփոխությունները հետաձգելը և «եռյակի» գործունեության արդյունքում ՀՀ նախկին վարչապետ Տիգրան Սարգսյանի պաշտոնանկությունը։

Մարտիրոսյանը նաև անթույլատրելի է համարում պատերազմական իրավիճակում գտնվող երկրում ազատամարտիկներին ծեծի ենթարկելը։

–Դա, ինչպես նաև Արամ Մանուկյանի դեմ հարձակումն անընդունելի և ստոր քայլ է: Երկիրն այս ձևով ուղղակի գնում է ավարտ։ Պետք է շարժվել իշխանափոխության պահանջն առաջ տանելով,–ասել է նա:

Ինչ վերաբերում է հունվարի 20-ին ԲՀԿ նախագահ Գագիկ Ծառուկյանի հրավիրած խորհրդաժողովին, «Ժառանգությունը» դեռ չի քննարկել իր մասնակցության հարցը, բայց, անկախ ամեն ինչից, Ա. Մարտիրոսյանը կարծում է՝ այդ քննարկումը չի անդրադառնա ոչիշխանական «եռյակի» համագործակցության վրա:

–Կարծում եմ, որ մենք կմասնակցենք ամսի 20-ի քննարկմանը,–հավելել է նա։

7or.am