Ինչպես արդեն տեղեկացրել էինք, ՀՀ ԱԺ «Բարգավաճ Հայաստան» խմբակցության անդամներ Միքայել Մելքումյանը, Վահան Բաբայանը և Վահե Էնֆիաջյանը քիչ առաջ այցելել են Կառավարության շենքի մոտ բողոքի գործողություն իրականացնող անհատ ձեռներեցներին։
Պատգամավոր Վահան Բաբայանն իր խոսքում նշել է, որ միայն միասնական լինելու դեպքում հնարավոր կլինի թելադրել և պարտադրել ժողովրդի կամքը. «Այստեղ երբ կլինի լիքը հրապարակ, երբ դուք կկարողանաք պահել այս հրապարակը, յուրաքանչյուր հարց մեր երկրում, որն անլուծելի է, կլուծվի», – նա նաև հավելել է, որ ողջունում է ձեռներեցներին՝ որպես իրենց իրավունքների տեր, ազատ, անկախ քաղաքացիների։

ԲՀԿ-ական պատգամավորը հանրությանը ևս մեկ անգամ ասել է, որ ԲՀԿ առաջնորդ Գագիկ Ծառուկյանը ժողովրդի կողքին է, և պատգամավորներն իրենց ներկայությամբ եկել են՝ փաստելու դա։

-Երկուշաբթի գալու ենք Ազգային ժողով և արտահերթ կարգով այդ հարցը դնելու ենք քվեարկության։ Ո՞ւր են ձեր կողմից ընտրված պատգամավորները, ո՞ւր է այն խորհրդարանը, որը կարող է և պարտավոր է զբաղվել ձեր հարցերով: Տեսե՛ք և ճանաչե՛ք՝ մարդիկ որտեղ են, և ինչով են զբաղված, – ասել է պատգամավորը։

7or.am