ԵԱՀԿ-ի Մինսկի խմբի համանախագահները հայտարարություն են տարածել, որում ասված է, որ տարածաշրջան իրենց վերջին այցի հիմնական նպատակը կողմերին կոչ անելն էր խստորեն պահպանել հրադադարը հունվարին բռնության վտանգավոր աճից հետո:

Փետրվարի 16-19-ը կայացած այցի ընթացքում միջնորդները հանդիպել են Սերժ Սարգսյանի և Իլհամ Ալիևի, երկու երկրների արտգործնախարարների և «Լեռնային Ղարաբաղի փաստացի իշխանությունների» հետ։ Ջեյմս Ուորլիքը, Իգոր Պոպովը և Պիեռ Անդրիոն հայտնում են, որ այդ հանդիպումների ժամանակ կողմերը հաստատել են իրենց նվիրվածությունը Լեռնային Ղարաբաղի հակամարտության խաղաղ կարգավորմանը, իսկ ՍերԺ Սարգսյանն ու Իլհամ Ալիևը համաձայնել են ուսումնասիրել համանախագահների առաջարկները, «որոնք կարող են ամրապնդել հրադադարը»:

Հայտարարությունում նաև նշվում է, որ քննարկել են կարգավորման ուղղությամբ հաջորդ քայլերը, ինչպես նաև այս տարի ավելի ուշ ակնկալվող Սերժ Սարգսյանի և Իլհամ Ալիևի հանդիպման նախապատրաստման հարցերը:

7or.am