ԼՂՀ–ում ավարտվել է կուսակցությունների ընտրացուցակների և քաղաքացիների առաջադրման ժամկետը ԱԺ 2015թ. մայիսի 3-ի հերթական ընտրություններին մասնակցելու համար: Այս մասին տեղեկանում ենք ԼՂՀ ԿԸՀ–ից։

Համամասնական ընտրակարգով մասնակցության համար փաստաթղթերը ԼՂՀ ԿԸՀ է ներկայացրել 7 կուսակցություն՝ «Կոմունիստական», «Շարժում-88» և «Ազգային վերածնունդ» կուսակցությունները՝ 14-ական,«Արցախի ժողովրդավարական կուսակցությունը»՝ 35, «Հայ Յեղափոխական Դաշնակցությունը»՝ 34, «Ազատ Հայրենիք»–ը՝ 50, «Խաղաղություն և զարգացում»–ը՝ 6 թեկնածուների ընդգրկմամբ:

Նախնական տվյալներով՝ հանրապետության բոլոր ընտրատարածքներում մեծամասնական ընտրակարգով առաջադրվել է 50 քաղաքացի, որից 27-ն ինքնաառաջադրվել է։

3 թեկնածու առաջադրել է ՀՅԴ–ն, 4-ական թեկնածուներ՝ «Ազատ Հայրենիք»–ը և «Արցախի ժողովրդավարական կուսակցությունը», 5-ը՝ «Ազգային վերածնունդ»–ը, 7-ը՝ «Շարժում-88»–ը։

Նշվում է նաև, որ մեծամասնական ընտրակարգով առաջադրված քաղաքացիներից 34-ն անկուսակցական է։

7or.am