Ապրիլի 21-ին Հունաստանը նախատեսում է ՌԴ-ի հետ պայմանագիր ստորագրել, որի համաձայն՝ Ռուսաստանը 3-5 մլրդ եվրո կտրամադրի Հունաստանին՝ որպես կանխավճար Հունաստանի տարածքում «Թուրքական հոսք» գազատարի հատվածի կառուցման համար:

Ինչպես տեղեկացնում է «Spiegel Online»-ը, գործարքը կօգնի Հունաստանին հաղթահարել այն ծանր տնտեսական իրավիճակը, որը ստեղծվել է եվրոպական վարկատուների հետ պետական պարտքի վերակառուցման հարցի վերաբերյալ բանակցությունների երկարաձգման պատճառով:

«Գազատարի կառուցման գործընթացում համագործակցության մասին հուշագիրը նախատեսվում է ստորագրել մոտ ապագայում: Դա մեծ իրադարձություն է ոչ միայն ռուս-հունական կապերի ամրապնդման, այլ նաև Եվրոպայի մեր տարածաշրջանի համար», - Ռուսաստան Հունաստանի կառավարական պատվիրակության այցի ժամանակ հայտարարել է Հունաստանի արդյունաբերական բարեփոխումների, շրջակա միջավայրի պահպանության և էներգետիկայի նախարար Պանայոտիս Լաֆազանիսը:

Հիշեցնենք՝ 2014թ. դեկտեմբերի 1-ին ռուսական «Գազպրոմի» և թուրքական «Բոթաս» ընկերությունների միջև ստորագրվել է հուշագիր՝ Սև ծովի հատակով Ռուսաստանից դեպի Թուրքիա գազատարի կառուցման վերաբերյալ:

7or.am