Ուշագրավ դեպք է տեղի ունցել ԱՄՆ-ում: Ինդիանայի համալսարանի ուսանող, 26-ամյա Յամինի Քարանամի գլխուղեղում հայտնաբերել են նրա երկվորյակ քրոջը:

Ինչպես տեղեկացնում է «DailyMail»-ը, առաջին անգամ Յամինին իր առողջության հետ կապված խնդիրներ է նկատել դեռ անցած տարվա սեպտեմբերին:

«Երբ սենյակում գտնվող մարդիկ խոսում էին իրար հետ, ես չէի հասկանում, թե ինչ է տեղի ունենում», - պատմել է կինը:

Խնդրի պատճառը պարզելու նպատակով Յամինին դիմել է Լոս Անջելեսի Գանգի հիմքի վիրաբուժության կենտրոնի բժիշկ Հրայր Շահինյանին, ով կնոջ մոտ ախտորոշել է գլխուղեղի ուռուցք: Հետազոտելով ուռուցքի բնույթը՝ բժիշկը որոշում է կայացրել հեռացնել այն՝ դիմելով միկրոսկոպիկ վիրահատության: Սակայն վիրահատության ընթացքում Հ. Շահինյանը, ով մոտ 7 հազ ուռուցք է հեռացրել, եկել է անակնկալի, քանի որ ուռուցքի փոխարեն կնոջ ուղեղում հայտնաբերել է տերատոմա՝ ոսկրեր, ատամներ և նույնիսկ մազեր ունեցող Յամինիի երկվորյակ քրոջը:

«Պարզվեց՝ սա իմ «հրեշ» քույրն էր, ով 26 տարի տանջել է ինձ», - վիրահատությունից հետո ասել է Յամինին:

Այժմ կինն անցնում է վերականգնողական բուժում, և բժիշկը վստահ է, որ մոտ 3 շաբաթ անց Յամինին կկարողանա վերադառնալ իր առօրյա կյանքին:

7or.am