Հենց նոր «Ո՛չ թալանին» նախաձեռնության անդամ Վաղինակ Շուշանյանը Բաղրամյան պողոտայում ընթացող անժամկետ նստացույցի ժամանակ հայտնել է, որ այսօր Արագածոտնի մարզում ևս բողոքի գործողություն է տեղի ունենալու ընդդեմ էլէներգիայի սակագնի բարձրացման։

–Զանգահարեցին և ասացին, որ նաև Վաշինգթոնում Հայաստանի հյուպատոսարանի դիմաց 3 հազարից ավելի մարդ սատար է կանգնել մեզ, և բողոքել է Հայաստանում էլեկտրաէներգիայի սակագնի բարձրացման դեմ։ Ստրասբուրգում ևս մեծ բողոքի ակցիա է տեղի ունենում։ Գերմանիայի և Ֆրանսիայի մի շարք քաղաքներում՝ նույնպես։ Սա կոնսոլիդացիայի մեծ հարց էր, և հայ ազգը բողոքի է դուրս եկել։ Հաղթելո՛ւ ենք,–հայտարարել է Վ. Շուշանյանը։

Վրաստանում ևս ցույց է նախատեսված։

Չարենցավանում էլ ավտոերթ է տեղի ունենալու, որի մասնակիցները գալու են Երևան և միանալու Բաղրամյան պողոտայում ցույց իրականացնողներին։

Հիշեցնենք, որ Գյումրիում էլ արդեն երկրորդ օրն է նստացույցը շարունակվում։

7or.am