Յամալում՝ Մերձուրալյան շրջանի «Կանաչ զառիթափ» հնագիտական համալիրում, գիտնականների խումբն արժեքավոր գտածո է հայտնաբերել։ Ինչպես հաղորդել է Յամալա-նենեցական ինքնավար շրջանի Արկտիկայի ուսումնասիրության կենտրոնի աշխատակից Ալեքսանդր Գուսևը, գտածոն հնագույն շիրիմ է՝ մոտավորապես մ.թ. 13–րդ դարով թվագրվող։

Գերեզմանում հայտնաբերվել է լավ պահպանված, կեչակեղևից հյուսված բոժոժ, որում, հավանաբար, մարդու մումիա է գտնվում։ Բոժոժի երկարությունը 1 մ 30 սմ է, լայնությունը՝ մոտ 30 սմ։ Բոժոժը կրկնում է մարդկային մարմնի ուրվագծերը։

Գիտնականների խոսքերով՝ եթե դրանում իսկապես մումիա կա, ապա գլուխը և գանգը, հավանաբար, լավ պահպանված կլինեն։ Ենթադրվում է, որ բոժոժում երեխայի մումիա է գտնվում։ Նշվում է նաև, որ մետաղորսիչ սարքը զգալի քանակությամբ մետաղե իրեր է գրանցել։

Շուտով գտածոն մանրակրկիտ կհետազոտվի և կսքանավորվի՝ արտեֆակտի ճշգրիտ պատկերը ստանալու և թաղման ժամանակաշրջանը պարզելու համար։

7or.am