Քաղաքաշինության նախարար Նարեկ Սարգսյանն այսօր լրագրողների հետ զրույցում անդրադարձել է Կարեն Դեմիրճյանի անվան մարզահամերգային համալիրի սեփականատիրոջ փոփոխմանը և նշել, որ մինչ այժմ էսքիզային որևէ պրոյեկտ ո՛չ նախարարությունը, ո՛չ քաղաքապետարանը չեն ստացել։

Միաժամանակ, նա նշել է, որ թույլ չեն տա նոր սեփականատիրոջը՝ միջամտի Մարզահամերգային համալիրի շենքի ճարտարապետական տեսքին և դեֆորմացնի այն։

Ինչ վերաբերում է նոր սեփականատիրոջ՝ օֆշորային գոտում գտնվելու հանգամանքին, Ն. Սարգսյանը նշել է, որ ոչինչ ասել չի կարող, քանի որ Քաղաքաշինության նախարարությունն օֆշորային թեմաներով չի զբաղվում:

Խոսելով Երիտասարդական պալատի չկառուցվելու մասին՝ նա հայտարարել է, որ որպես ճարտարապետ՝ որոշ առումով բավարարված է այդ վիճակով։

–Չէի ուզենա, որ մրցույթում հաղթած ճապոնական այդ նախագիծը կյանքի կոչվեր: Օտար, Երևանի հետ ոչ մի կապ չունեցող շինություն էր, մի անհասկանալի խոշոր, ահռելի կառույց, բնակելի տուն,–հավելել է նա:

Ինչ վերաբերում է Կրկեսի շենքի կառուցմանը, ապա Ն. Սարգսյանը վստահեցրել է, որ այն ավարտին կհասցվի 2016թ. վերջին կամ 2017թ. սկզբին:

7or.am