Մեկնաբանություն

14.11.2015 00:10


Հանձնող «ընդդիմադիրներն» ու «առաջադեմներն»՝ ընդդեմ «հետադիմական» Ռոբերտ Քոչարյանի

Հանձնող «ընդդիմադիրներն» ու  «առաջադեմներն»՝ ընդդեմ «հետադիմական» Ռոբերտ Քոչարյանի

Փաստեր, տարեթիվ ու ամսաթիվ չեմ մատնանշում, քանի որ դրանք ավելի քան հայտնի են երկրում մնացած առնվազն մի բուռ ժողովրդի համար:

2000-ականներին ընդդիմադիր կոչված ուժերն ու գործիչները «մի հանգի» ճղճղում էին, թե Քոչարյանը ծախում է Մեղրին, իսկ ավելի «խիզախներն» արդեն պնդում էին, թե «ծախել-պրծել» է:

Վերջում պարզվեց, որ այդ ամենը «Փչան Թոդորոսի» պատմության շարքից է: Իսկ ավելի ուշ պարզվեց, որ ծուղրուղու կանչողները ոչ միայն «հավեր» էին, այլեւ հետագայում թառեցին Սերժ Սարգսյանի «հավաբնի» հարմարավետ ճաղերին:

Նույն այդ «հավերը» 2000-ականներին իրենց մեջտեղից ճղում էին, մորմոքվում, որ Քոչարյանը ԼՂ բանակցային գործընթացից դուրս է թողել Արցախը: Թեև արդյունքն այն է, որ Քոչարյանին հաջողվեց պահել ստատուս քվոն ու զուգահեռաբար զարգացնել Հայաստանի տնտեսությունը՝ հաջողացնելով նաև ներգաղթ ապահովել։

Օսկանյանի մասով էլ ինչ կչկչոց ասես, որ չլսեցինք: Էս կչկչացողները, կրկին հիշեցնենք, հետո դարձան «Սերժի վկա», ավելի ճիշտ՝ հաճախորդ, իսկ վերջերս էլ նրանց գերակշիռ մասը Բ26-ում ծնկի եկավ «նախաձեռնողականության տիտանի» առջեւ:

Հիմա` ՀՀԿ-ական մի պատգամավոր, մի սնոբ, որի կարիերայի բարձրակետը Քիմի հետ ընթրելն է եղել, հանդես գալով որպես իր առաջնորդի «թարգմանիչ» հրապարակավ հայտարարում է, թե ի՞նչ եք իրար խառնվել, պետք լինի ազատագրված տարածքները կհանձնենք Ադրբեջանին:

Եվ այս սնոբին էն նույն «ընդդիմադիրների» կողմից (որ հիմա կախվել են ՀՀԿ ղեկավարի վարտիկից) պատասխանող չկա: Ռազմահայրենասիրությունն այս դեպքում պապանձվում է: Պատասխանելու հրահանգ չկա, քանզի վարտիկի մեջ գտնվող ոտքը ոչ մի շարժում չի անում: Դե, իսկ Շարմազանովն էլ ասում է`սնոբի հայտարարությունը ոչ լսել եմ, ոչ էլ աչքովս է ընկել:

Էս սնոբն, ի դեպ, մի երկու օր առաջ էլ անհուն զզվանքով խոսում էր աֆրիկյան երկրներում կիրառվող փորձի մասին, որտեղ ընտրությունների ժամանակ մարդկանց մատները թանաքոտում են: Ո՞նց կարելի է նման բան, ախր մենք քաղաքակիրթ երկիր ենք, մեր նախագահը «արեւմտամետ» է, ու մենք չենք կարող դիմել նման քայլի:

Այսինքն` սնոբը եթե ֆրակով ու սպիտակ ձեռնոցներով է մասնակցում հանրաքվեին, ուղղակի, մեղք է թանաքոտել նրա մատը կամ ձեռնոցի այդ հատվածը:

-Օ՚հ, ավելի բարբարոսական բան չկա, քան ձեռքը թանաքոտելը,- գիշերները տվայտվում է սնոբը, որի համար (իմա` իր առաջնորդի համար) առաջնային խնդիրը ազատագրված տարածքներն հանձնելն է ու թանաքից-բանից հեռու մնալը:

Նույն մտածողությունն է` հո մենք վայրենի աֆրիկացի չե՞նք, պետք է անսանք միջազգային հանրության ձայնին եւ հանձնենք ազատագրված տարածքները:

Իսկ հիմա իրողությունն այն է, որ մինչեւ 2008-ը եւ դրանից հետո էլ Մեղրին մնացել է իր տեղում, իսկ բանակցային գործընթացից Արցախը դուրս թողնելու «սխալ» քայլին ի պատասխան, գործող իշխանությունն էդ «դարդին» չդիմանալով` մտադրվել է հանձնել ազատագրված տարածքները: Կամ էլ, երեւի, ՀՀԿ ղեկավարն այդ քայլին է գնում թուրքերի ինադու, ովքեր այդպես էլ չընդառաջեցին իր մուրազի կատարմանը` այդպես էլ թույլ չտալով դառնալ Ստեփանակերտ-անհայտ ուղղությամբ թռիչքի առաջին ուղեւորը:

Ազատագրված տարածքները կհանձնի ու …կթռչի որքան սիրտն ուզում է:

Կիմա Եղիազարյան

Այս խորագրի վերջին նյութերը