Մեկնաբանություն

16.11.2015 00:10


Սերիալային դերասանների հացը խլում են

Սերիալային դերասանների հացը խլում են

Հայաստանում արդեն մի քանի օր է՝ լրատվամիջոցների մեծ մասը, բերանից «լոզերը թափելով», հայտարարում է, թե սահմանադրական հանրաքվեի թեմայով ռեալիթի շոուի կազմակերպումն աննախադեպ իրադարձություն է:

Է՛հ, Քիմի ռեալիթին էլ էր աննախադեպ: Հետո՞: Ինքն անձամբ լավ հարստացավ:

Հայկականի դեպքում ժողովուրդը ոչ միայն չի հարստանալու, այլ ավելի է թշվառանալու: Էլ չասած պետությանը սպասվող ՌԵԱԼ աղետի մասին:

Հայկական ռեալիթին, այո՛, «աննախադեպ» է նրանով, որ իշխանությունը որոշել է շոուի միջոցով գոլորշի բաց թողնել: Սա՛ է այդ իրապատում թամաշայի նպատակը:

Դե, որ ժողովուրդն այլեւս Ազատության հրապարակի կողմը չնայի, այլ տեղում` իր գյուղում կամ մարզկենտրոնում սրտի ուզածի չափ «միտինգ» անի: Իսկ տեղում կարելի է խոսել այն մասին, թե «տռակտռըդ ինչ հզորություն ա բացում»: Ու նման բաներ:

Ի դեպ, հեռուստաընկերությունները կարող են փակել իրենց սերիալները, քանզի լուրջ մրցակից է հայտնվել: Բաղրամյան 26-ի շոուն ահագին թանկարժեք է: Զավտրիկը, աբեդն ու ուժինը պայմանական այո-ականների ու ոչ-ականների համար ապահովված ենէ: Չհաշված մնացած կոմֆորտը ՀՀ-ի հյուսիսում եւ հարավում:

Իշխանությունն ու «ընդդիմությունը» միասին «Գինի լից» են երգում, եսիմ` Կոմիտաս ու ազգային-ազատագրական երգեր են երգում, շա՜տ ջիգյարով շփվում են իրար հետ: Իսկ նրանց շուրջ հավաքված մի քանի գյուղացիներն էլ լսում են «հակադիր» կարծիքներն ու ոչինչ չեն հասկանում:

Մարդիկ չեն հասկանում, թե ոնց կարող են նիսյայով «այո» ասել ՀՀԿ ղեկավարի նախագծին ու սպասել, որ իրենց կյանքը կարող է լավանալ…էշի զատկին:

Բայց ամենազարմանալին Սերժ Սարգսյանի նախկին մամուլի քարտուղարի ակտիվ մասնակցությունն է Բ26-ի ռեալիթի շոուին: Նշված պաշտոնում նա երկու տարի ձայն չի հանել, իսկ երբ հրաժարական տվեց մամուլի քարտուղարի պաշտոնից, հայտարարեց, թե գնում է աշխատելու մասնավոր հատվածում: Դու մի ասա՝ մասնավոր հատվածն էս ռեալիթի շոուն էր, ու հիմա Սաղաթելյանն իրեն զգում է՝ ինչպես ձուկը ջրում: Այսինքն` ինչպես КВН-ում: Օրերով խոսում ու վիճում է, տաքացած բանավիճում…Ում հետ, ինչու, ինչի համար` հայտնի չէ…Պարզապես երիտասարդը դերի մեջ է: Զգում ես, թե ո՜նց է կարոտել «Ուրախների եւ հնարամիտների» մրցույթը:

Դե, շեֆն էլ, «ընդառաջելով», նրան ուղարկել է КВН:

Ի դեպ, նաեւ ուշադիր լսեք նախկին այլախոհ Ազատ Արշակյանի ելույթները: Սկսում է «ոչ»-ի ոգով, իսկ վերջում պարզվում է՝ լրիվ «այո»-ի անուրանալի կողմնակից է: Հրանտ Բագրատյանն էլ է շոուի մեջ, ինչը բնական է ֆոտոսեսիայից հետո։ Զզվելի է:

Ավելին` պալատական ծաղրածուների վերածված «այլախոհները» և «ընդդիմադիրները» ահավոր գարշելի են: Մի խոսքով, նողկալի, սրտխառնոց առաջացնող շոու է մտահղացել Բ26-ը:

Կիմա Եղիազարյան

Այս խորագրի վերջին նյութերը